തിരുവനന്തപുരം: ഗതാഗതം തടസ്സപ്പെടുത്തി പ്രതിമയ്ക്ക് ഭിത്തിനിര്മ്മിച്ചത് വാഹനയാത്രക്കാരെ ബുദ്ധിമുട്ടിലാക്കുന്നു. ഏറെ തിരക്കേറിയ തിരുമല ജംഗ്ഷനിലാണ് മുമ്പ് സ്ഥാപിച്ചിരുന്ന ഇന്ദിരാഗാന്ധി പ്രതിമയുടെ ചുവട്ടില് റോഡിലേക്ക് ഇറക്കി ഭിത്തി നിര്മിച്ച് ഗതാഗതക്കുരുക്ക് ഉണ്ടാക്കുന്നത്. അനുമതിയില്ലാതെയാണ് ഭരണത്തിന്റെ മറവില് കോണ്ഗ്രസുകാരുടെ അനധികൃത ഭിത്തി നിര്മിക്കല്.
കാട്ടാക്കടയില് നിന്നും പൂജപ്പുരയില് നിന്നും തൃക്കണ്ണാപുരത്ത് നിന്നും വരുന്ന വാഹനങ്ങള് വഴിതിരിഞ്ഞു പോകുന്ന പ്രധാന ജംഗ്ഷന്കൂടിയാണ് തിരുമല. കുപ്പികഴുത്തുപോലെയാണ് തിരുമല ജംഗ്ഷന്. ഈ ജംഗ്ഷന്റെ ഒത്ത നടുവിലാണ് പ്രതിമ സ്ഥാപിച്ചിരിക്കുന്നത്. രാവിലെയും വൈകുന്നേരവും രൂക്ഷമായ ഗതാഗതക്കുരുക്കാണ് അനുഭവപ്പെടുന്നത്. ഗതാഗതക്കുരുക്ക് ഉണ്ടാകാതിരിക്കാന് പ്രതിമ മാറ്റി സ്ഥാപിക്കണമെന്ന് പ്രദേശത്തെ റസിഡന്റ് അസോസിയേഷനും ജനപ്രതിനിധികളും ആവശ്യപ്പെട്ടെങ്കിലും കോണ്ഗ്രസുകാര് തയ്യാറായില്ല. ഇപ്പോള് ഗതാഗതക്കുരുക്ക് രൂക്ഷമാകുന്ന തരത്തില് റോഡിലേക്ക് ഇറക്കി ഭിത്തി കൂടി നിര്മിച്ചതോടെ തിരുമല കടന്നുപോകാന് മണിക്കൂറുകള് കാത്ത് കിടക്കേണ്ടി വരുന്നു.
വെള്ളയാണിയില് നിന്നും തൃക്കണ്ണാപുരം വഴി നിരവധി വാഹനങ്ങളാണ് ഇപ്പോള് തിരുമല വഴി കടന്നുപോകുന്നത്. ഇതോടെ ഇതുവഴി പോകുന്ന വാഹനങ്ങളുടെ ഇരട്ടിയിലധികമായി. രാവിലെ വിദ്യാലയങ്ങളിലും സര്ക്കാര് ഓഫീസുകളിലും പോകുന്നവര് പ്രതിമ കാരണം നന്നേ ബുദ്ധിമുട്ടിലാകുന്നു. പ്രതിമയില് തട്ടാതരിക്കാന് വാഹനങ്ങള് വേഗത കുറച്ച് ഒച്ചിഴയുന്ന തരത്തില് പോകേണ്ട അവസ്ഥ. ഇതോടെ വാഹനങ്ങളുടെ നീണ്ടനിരയാണ് അനുഭവപ്പെടുന്നത്.
