തിരുവനന്തപുരം: മൂന്ന് മാസത്തെ സബ്സ്ക്രിപ്ഷന് എടുത്ത കാലയളവില് വാഗ്ദാനം ചെയ്തത് 100 വിവാഹാലോചനകളുടെ സമ്പര്ക്ക വിവരങ്ങള്. എന്നാല് നല്കിയത് 51 എണ്ണം മാത്രം.
മാട്രിമോണിയല് വെബ്സൈറ്റ്, സേവനത്തില് വീഴ്ച വരുത്തിയെന്ന് കേരള സംസ്ഥാന ഉപഭോക്തൃ കമ്മീഷന് കണ്ടെത്തി. എന്നാല്, പരാതിക്കാരന് 51 കോണ്ടാക്റ്റുകള് നല്കിയിട്ടുണ്ടെന്നതിനാല് ജില്ലാ ഉപഭോക്തൃ കമ്മീഷന് ഉത്തരവിട്ട 25,960 രൂപയുടെ റീഫണ്ട് തുക സംസ്ഥാന കമ്മീഷന് 15,000 രൂപയായി കുറച്ചു.
M4Marry.com അനുയോജ്യമായ വിവാഹാലോചനകള് വാഗ്ദാനം ചെയ്ത് 25,960 രൂപയാണ് പരാതിക്കാരനില് നിന്ന് വാങ്ങിയത്. പരാതിക്കാരന് നല്കിയ രസീതില് 100 കോണ്ടാക്റ്റുകള് നല്കുമെന്ന് രേഖപ്പെടുത്തിയെങ്കിലും 51 കോണ്ടാക്റ്റുകള് മാത്രമാണ് കമ്പനി നല്കിയതെന്ന് കേരള സംസ്ഥാന ഉപഭോക്തൃ കമ്മീഷന് കണ്ടെത്തി.
അനുയോജ്യമായ പ്രൊഫൈലുകളൊന്നും ലഭിച്ചിട്ടില്ലെന്ന് പരാതിക്കാരന് പറഞ്ഞു. 2024 ജൂണ് 19ന് പരാതിക്കാരന്റെ പ്ലാന് കാലാവധി അവസാനിച്ചെന്നും സേവനം തുടര്ന്നും ലഭിക്കാന് പ്ലാന് പുതുക്കണമെന്നും വെബ്സൈറ്റ് അധികൃതര് അറിയിച്ചു. തുടര്ന്നാണ് പരാതിക്കാരന് കോട്ടയം ജില്ലാ ഉപഭോക്തൃ തര്ക്ക പരിഹാര കമ്മീഷനെ സമീപിച്ചത്.
