ന്യൂഡൽഹി: രാജ്യത്തിന്റെ 80-ാമത് സ്വാതന്ത്ര്യദിനാഘോഷങ്ങൾക്ക് മുന്നോടിയായി ദേശീയ തലസ്ഥാനത്ത് സുരക്ഷാ ക്രമീകരണങ്ങൾ അതീവ ശക്തമാക്കി. ഇത്തവണത്തെ നാഴികക്കല്ലായ 80-ാമത് സ്വാതന്ത്ര്യദിനാഘോഷം ചെങ്കോട്ടയുടെ ചരിത്രത്തിൽ ഒരു അപൂർവ്വ നിമിഷത്തിന് കൂടിയാണ് സാക്ഷ്യം വഹിക്കാൻ പോകുന്നത്. ചരിത്രത്തിൽ ആദ്യമായി ചെങ്കോട്ടയുടെ മുകളിൽ നിന്ന് ഇത്തവണ ദേശീയ ഗീതമായ ‘വന്ദേമാതരം’ ആലപിക്കും. ഇന്ത്യയുടെ ‘യുവശക്തി’ക്ക് വലിയ പ്രാധാന്യം നൽകിക്കൊണ്ടാണ് ഇത്തവണത്തെ ആഘോഷങ്ങൾ സംഘടിപ്പിച്ചിരിക്കുന്നത്.
രാജ്യത്തിന്റെ പുരോഗതിക്കായി വിദ്യാർത്ഥികളും യുവാക്കളും നൽകുന്ന സംഭാവനകളെ ചടങ്ങിൽ ആദരിക്കും. ഹൈദരാബാദിലെ ‘ടി-വർക്സ്’ പോലുള്ള ഇന്നൊവേഷൻ ഹബുകളുടെ പിന്തുണയോടെ കുറഞ്ഞ ചെലവിൽ ബഹിരാകാശ സാങ്കേതികവിദ്യകൾ വികസിപ്പിക്കുകയും ബഹിരാകാശ അവശിഷ്ടങ്ങൾ പോലുള്ള വെല്ലുവിളികൾക്ക് പരിഹാരം കാണുകയും ചെയ്യുന്ന യുവ സ്റ്റാർട്ടപ്പുകളെയും എൻജിനീയർമാരെയും ഈ വേദിയിൽ പ്രത്യേകം ഉയർത്തിക്കാട്ടും. ഓഗസ്റ്റ് 15-ന് പ്രധാനമന്ത്രി നരേന്ദ്ര മോദി ചെങ്കോട്ടയിൽ വെച്ച് രാജ്യത്തെ അഭിസംബോധന ചെയ്യുന്ന ചടങ്ങിൽ കനത്ത സുരക്ഷ ഉറപ്പാക്കാൻ ഡൽഹി പൊലീസും കേന്ദ്ര സുരക്ഷാ ഏജൻസികളും സംയുക്തമായി രംഗത്തുണ്ട്.
നഗരത്തിലേക്കുള്ള പ്രവേശന കവാടങ്ങളിലും തന്ത്രപ്രധാന മേഖലകളിലും കർശനമായ പരിശോധനയാണ് പുരോഗമിക്കുന്നത്. ചടങ്ങുകളുടെ പുതിയ ക്രമീകരണമനുസരിച്ച്, പ്രധാനമന്ത്രി ചെങ്കോട്ടയിൽ എത്തിക്കഴിഞ്ഞാൽ ആദ്യം ദേശീയ ഗീതം ആലപിക്കുകയും ആ സമയം എല്ലാവരും എഴുന്നേറ്റു നിൽക്കുകയും ചെയ്യും. അതിനുശേഷമായിരിക്കും പ്രധാനമന്ത്രി ദേശീയ പതാക ഉയർത്തുന്നതും തുടർന്ന് ദേശീയ ഗാനം ആലപിക്കുന്നതുമെന്ന് പ്രതിരോധ സെക്രട്ടറി ആർ.കെ. സിംഗ് വാർത്താസമ്മേളനത്തിൽ വ്യക്തമാക്കി.
