കൊച്ചി:മുട്ടില് മരംമുറിയിലെ വിശ്വാസവഞ്ചനാ കേസില് അഗസ്റ്റിന് സഹോദരങ്ങള് വിചാരണ കോടതിയില് കീഴടങ്ങി. ചോറ്റാനിക്കര കോടതി ജാമ്യമില്ലാ അറസ്റ്റ് വാറന്റ് പുറപ്പെടുവിച്ച് മണിക്കൂറുകള്ക്കുള്ളില് ആന്റോഅഗസ്റ്റിനും ജോസുകുട്ടി അഗസ്റ്റിനും കോടതിയില് കീഴടങ്ങുകയായിരുന്നു.
മറ്റൊരു പ്രതി റോജി അഗസ്റ്റിന് ഇന്ന് ഹാജരായില്ല. വരുന്ന 13-ാം തീയതി ഹാജരാകാന് കോടതി നിര്ദ്ദേശം നല്കി. വയനാട്ടിലെ മുട്ടില്, മേപ്പാടി എന്നിവിടങ്ങളില് നിന്ന് നിയമവിരുദ്ധമായി മരങ്ങള് മുറിച്ച് എറണാകുളത്തെ മരക്കമ്പനി ഉടമ അലിയാര്ക്ക് വിറ്റതുമായി ബന്ധപ്പെട്ടാണ് കേസ്. വനംവകുപ്പിന്റെ ഔദ്യോഗിക പാസ് ഉണ്ടെന്ന് തെറ്റിദ്ധരിപ്പിച്ചാണ് വില്പന നടത്തിയത്.
വിവാദമായതിനെത്തുടര്ന്ന് തടികള് വനംവകുപ്പ് കസ്റ്റഡിയിലെടുത്തിരുന്നു. തുടര്ന്ന് മരക്കമ്പനിയുടമയുടെ പരാതിയുടെ അടിസ്ഥാനത്തില് അമ്പലമേട് പൊലീസ് പ്രതികള്ക്കെതിരെ വിശ്വാസവഞ്ചനാക്കുറ്റം ചുമത്തി എഫ്ഐആര് രജിസ്റ്റര് ചെയ്തു. ചോറ്റാനിക്കര കോടതി കുറ്റപത്രം വായിച്ചു കേള്ക്കാന് ഹാജരാകാന് ആവശ്യപ്പെട്ടിരുന്നെങ്കിലും പ്രതികള് കോടതിയില് എത്തിയില്ല.
ഈ സാഹചര്യത്തിലാണ് കോടതി അറസ്റ്റ് വാറന്റ് പുറപ്പെടുവിച്ചത്. വാറന്റ് പുറത്തുവന്നതിന് പിന്നാലെ ആന്റോ അഗസ്റ്റിനും ജോസുകുട്ടി അഗസ്റ്റിനും കോടതിയില് നേരിട്ട് ഹാജരായി.
