കഴിഞ്ഞ ഒരു ദശകത്തിനിടയില് ഭാരതത്തിന്റെ അടിസ്ഥാന സൗകര്യ വികസന രംഗത്ത് വിപ്ലവകരമായ മാറ്റങ്ങളാണ് ദൃശ്യമാകുന്നത്. സാമ്പത്തിക ഭദ്രത ഉറപ്പാക്കുന്നതിനൊപ്പം സാധാരണക്കാരന്റെ ജീവിതനിലവാരം ഉയര്ത്താനും ലക്ഷ്യമിട്ടുള്ള വിവിധ പദ്ധതികളിലൂടെ വന് കുതിച്ചുചാട്ടമാണ് രാജ്യം കൈവരിച്ചിരിക്കുന്നത്. 2014-ന് ശേഷമുണ്ടായിട്ടുള്ള പ്രധാന അടിസ്ഥാന സൗകര്യ വികസന നേട്ടങ്ങളിലൂടെ…
ഗതാഗത ശൃംഖലയിലെ കുതിച്ചുചാട്ടം
പ്രത്യേക ചരക്ക് ഇടനാഴികള്: 2014ന് മുമ്പ് കടലാസില് മാത്രം ഒതുങ്ങിനിന്നിരുന്ന പദ്ധതി പൂര്ണ്ണമായി യാഥാര്ത്ഥ്യമാക്കി. ഇന്ന് 2,843 കിലോമീറ്റര് ശൃംഖല പൂര്ണ്ണമായും പ്രവര്ത്തനസജ്ജമാണ്.
എക്സ്പ്രസ് വേയും ദേശീയപാതകളും: 2014-ല് 1,000 കിലോമീറ്റര് ഉണ്ടായിരുന്ന എക്സ്പ്രസ് വേ ശൃംഖലയിലേക്ക് 6,700 കിലോമീറ്റര് കൂടി കൂട്ടിച്ചേര്ത്തു. നിലവിലെ ശൃംഖലയുടെ 85 ശതമാനവും പുതിയതാണ്. കൂടാതെ 4-വരിയോ അതില് കൂടുതലോ ഉള്ള ദേശീയപാതകള് 18,371 കിലോമീറ്ററില് നിന്ന് 45,516 കിലോമീറ്റര് കൂടി വികസിപ്പിച്ചതോടെ മികച്ച റോഡ് ശൃംഖലയുടെ 60 ശതമാനവും കഴിഞ്ഞ 12 വര്ഷത്തിനിടയിലാണ് നിര്മ്മിക്കപ്പെട്ടത്.
മെട്രോ റെയില്: നഗര ഗതാഗതം സുഗമമാക്കുന്ന മെട്രോ റെയില് ശൃംഖല 250 കിലോമീറ്ററില് നിന്ന് 1,000 കിലോമീറ്റര് കൂടി വികസിപ്പിച്ചു. രാജ്യത്തെ മെട്രോ ശൃംഖലയുടെ 75 ശതമാനവും നിര്മ്മിക്കപ്പെട്ടത് ഈ ദശകത്തിലാണ്.
വിമാനത്താവളങ്ങള്: വ്യോമയാന മേഖലയിലെ ‘ഉഡാന്’ പദ്ധതിയിലൂടെ സാധാരണക്കാര്ക്കും വിമാനയാത്ര സാധ്യമാക്കി. 74 വിമാനത്താവളങ്ങള് ഉണ്ടായിരുന്ന സ്ഥാനത്ത് ഇന്നത് 164 ആയി ഉയര്ന്നു. നിലവിലുള്ള വിമാനത്താവളങ്ങളുടെ 55 ശതമാനവും പുതുതായി നിര്മിച്ചവയാണ്.
റെയില്വേയും നദീതട വാണിജ്യവും
റെയില്വേ വൈദ്യുതീകരണം: ചരിത്രത്തിലെ ആകെ റെയില്വേ വൈദ്യുതീകരണത്തിന്റെ 69 ശതമാനവും പൂര്ത്തിയാക്കിയത് കഴിഞ്ഞ 12 വര്ഷത്തിനിടയിലാണ്. വൈദ്യുതീകരിച്ച റെയില് പാതകളുടെ ദൈര്ഘ്യം 21,800 കിലോമീറ്ററില് നിന്ന് 69,800 കിലോമീറ്ററായി വര്ധിച്ചു.
ഉള്നാടന് ജലപാതകളും തുറമുഖങ്ങളും: പ്രകൃതിസൗഹൃദ ചരക്കുനീക്കത്തിനായി 32 പുതിയ ദേശീയ ജലപാതകള് കൂടി പ്രവര്ത്തനസജ്ജമാക്കി. ഉള്നാടന് ചരക്കുനീക്കം 29 എംഎംടിയില് നിന്ന് 218 എംഎംടിയായി വര്ദ്ധിച്ചു. സാഗര്മാല പദ്ധതിയിലൂടെ ആകെ തുറമുഖ ശേഷി 800 എംടിപിഎയില് നിന്ന് 2,760 എംടിപിഎ വര്ദ്ധിപ്പിച്ച് തുറമുഖ കൈകാര്യം ചെയ്യല് ശേഷിയുടെ 71 ശതമാനവും കൂട്ടിച്ചേര്ത്തു.
ഊര്ജ്ജ സുരക്ഷയും ഹരിതോര്ജ്ജവും
സൗരോര്ജ്ജവും പുനരുപയോഗ ഊര്ജ്ജവും: ആഗോള കാലാവസ്ഥാ സംരക്ഷണത്തില് മുന്നില് നില്ക്കുന്ന ഭാരതം, സൗരോര്ജ്ജ ശേഷി 2.6 ജിഗാവാട്ടില് നിന്ന് 162 ജിഗാവാട്ടിലേക്ക് ഉയര്ത്തി (98% വര്ദ്ധനവ്). ആകെ പുനരുപയോഗ ഊര്ജ്ജ ശേഷി 54 ജിഗാവാട്ടില് നിന്ന് 248 ജിഗാവാട്ടിലേക്ക് എത്തിക്കാന് ‘പഞ്ചാമൃത്’ ലക്ഷ്യങ്ങളിലൂടെ സാധിച്ചു.
വൈദ്യുതിയും പ്രസരണ ശൃംഖലയും: രാജ്യത്തിന്റെ ആകെ പവര് ഗ്രിഡ് ശേഷി 249 ജിഗാവാട്ടില് നിന്ന് 540 ജിഗാവാട്ടായി ഉയര്ന്നു (54% വര്ദ്ധനവ്). ദേശീയ വൈദ്യുതി പ്രസരണ ശൃംഖല 2.9 ലക്ഷം കിലോമീറ്ററില് നിന്ന് 5.0 ലക്ഷം സര്ക്യൂട്ട് കിലോമീറ്ററായി വ്യാപിപ്പിച്ചു.
സാധാരണക്കാരന്റെ ജീവിതസൗകര്യങ്ങള്
കുടിവെള്ള കണക്ഷനുകള് (ജല് ജീവന് മിഷന്): മുന്പ് 17% വീടുകളില് മാത്രം പൈപ്പ് വെള്ളം ലഭ്യമായിരുന്ന സ്ഥാനത്ത് ഇന്ന് 80% വീടുകളിലും കുടിവെള്ള ലഭ്യത ഉറപ്പാക്കി. നിലവിലെ അടിസ്ഥാന സൗകര്യത്തിന്റെ 79 ശതമാനവും വികസിപ്പിച്ചത് ഈ ദശകത്തിലാണ്.
പിഎന്ജിയും ഗ്യാസ് പൈപ്പ്ലൈനും: പൈപ്പ് വഴി വിതരണം ചെയ്യുന്ന പ്രകൃതിവാതക കണക്ഷനുകള് 25 ലക്ഷത്തില് നിന്ന് 1.6 കോടിയിലേക്ക് ഉയര്ത്തി. പിഎന്ജി ഇന്ഫ്രാസ്ട്രക്ചറിന്റെ 84 ശതമാനവും നല്കപ്പെട്ടത് കഴിഞ്ഞ 12 വര്ഷത്തിനുള്ളിലാണ്.
അതേസമയം, 15,000 കിലോമീറ്ററായിരുന്ന ഗ്യാസ് ഗ്രിഡ് കൂടുതല് വികസിപ്പിച്ച് 26,000 കിലോമീറ്റര് കൂടി കൂട്ടിച്ചേര്ത്തു. നിലവിലെ പൈപ്പ്ലൈന് ശൃംഖലയുടെ 42 ശതമാനവും സ്ഥാപിക്കപ്പെട്ടത് കഴിഞ്ഞ 12 വര്ഷത്തിനിടയിലാണ്.
ആരോഗ്യ രംഗത്തെ കുതിപ്പ്
എയിംസ്: 2014ല് 8 എയിംസ് സ്ഥാപനങ്ങള് മാത്രമുണ്ടായിരുന്ന സ്ഥാനത്ത് 15 എണ്ണം കൂടി കൂട്ടിച്ചേര്ത്ത് 23 എണ്ണമാക്കി (65% വര്ദ്ധനവ്).
മെഡിക്കല് വിദ്യാഭ്യാസ ശേഷി: രാജ്യത്തെ മെഡിക്കല് കോളേജുകളുടെ എണ്ണം 387-ല് നിന്ന് 844 ആയി ഉയര്ന്നു. ഇതോടൊപ്പം എംബിബിഎസ് സീറ്റുകള് 51,348-ല് നിന്ന് 1.39 ലക്ഷമായി വികസിപ്പിച്ചു.
വ്യാവസായിക നിര്മാണവും സ്വയംപര്യാപ്തതയും
പ്രതിരോധ കയറ്റുമതി: ‘ആത്മനിര്ഭര് ഭാരത്’ ആശയത്തിലൂന്നി പ്രതിരോധ കയറ്റുമതി 700 കോടി രൂപയില് നിന്ന് 38,424 കോടി രൂപയായി വര്ദ്ധിപ്പിച്ചു.
സ്റ്റാര്ട്ടപ്പ് വിപ്ലവം: 2014-ലെ 500 അംഗീകൃത സ്റ്റാര്ട്ടപ്പുകളില് നിന്ന് ഇന്ന് 2.30 ലക്ഷം സ്റ്റാര്ട്ടപ്പുകളിലേക്ക് ഉയര്ന്നു. രാജ്യത്തെ സ്റ്റാര്ട്ടപ്പ് രംഗത്തിന്റെ 99.8 ശതമാനവും ‘സ്റ്റാര്ട്ടപ്പ് ഇന്ത്യ’ പദ്ധതിയുടെ ഫലമാണ്.
സ്റ്റീല്, കല്ക്കരി ഉത്പാദനം: നിര്മ്മാണ മേഖലയുടെ അടിത്തറയായ അസംസ്കൃത സ്റ്റീല് ശേഷി 109 എം.ടി (മെട്രിക് ടണ്)യില് നിന്ന് 222 എം.ടിയായി വര്ദ്ധിപ്പിച്ചു. കല്ക്കരി ഉത്പാദനം 565 എം.ടിയില് നിന്ന് 1,000 എം.ടി എന്ന എക്കാലത്തെയും ഉയര്ന്ന നിരക്കിലെത്തിച്ച് രാജ്യത്തിന്റെ ഊര്ജ്ജ സുരക്ഷ ഉറപ്പാക്കി.
വിവിധ മേഖലകളില് കൈവരിച്ച ഈ ദ്രുതഗതിയിലുള്ള വികസനം, ഭാരതത്തെ ഒരു ശക്തമായ ആഗോള സാമ്പത്തിക ശക്തിയായി മാറ്റുന്നതില് നിര്ണ്ണായക പങ്കുവഹിക്കുന്നു.
ജന്മഭൂമി ഓണ്ലൈന്