തിരുവനന്തപുരം: ബാലഗോകുലം ബാലസംസ്കാര കേന്ദ്രത്തിന്റെ ജന്മാഷ്ടമി പുരസ്കാരം സാഹിത്യകാരി ഡോ. വി. സുജാതയ്ക്ക്. 51,000 രൂപയും ശില്പവും പ്രശംസാപത്രവും അടങ്ങുന്ന പുരസ്കാരം 29ന് തിരുവനന്തപുരത്ത് നടക്കുന്ന ചടങ്ങില് സമ്മാനിക്കും. ഭാരതീയ ദര്ശനങ്ങളെ സമകാലികമായി വ്യാഖ്യാനിക്കുന്ന ഡോ. സുജാതയുടെ മൗലിക രചനകള് ശ്രീകൃഷ്ണ സന്ദേശം സമൂഹത്തില് പ്രചരിപ്പിക്കുന്നതില് നിര്ണായക പങ്കുവഹിക്കുന്നതായി പുരസ്കാര സമിതി വിലയിരുത്തി.
ഡോ. എ.എം. ഉണ്ണികൃഷ്ണന് ചെയര്മാനും ഡോ. ജെ. പ്രമീളാദേവി, പി.കെ. വിജയരാഘവന്, പി. ശ്രീകുമാര്, എം. സത്യന് എന്നിവര് അംഗങ്ങളുമായ സമിതിയാണ് മുപ്പതാമത് ജന്മാഷ്ടമി പുരസ്കാരത്തിന് ഡോ. സുജാതയെ തെരഞ്ഞെടുത്തത്.
മുന് വര്ഷങ്ങളില് സുഗതകുമാരി, പി. പരമേശ്വരന്, മള്ളിയൂര് ശങ്കരന് നമ്പൂതിരി, മാതാ അമൃതാനന്ദമയി ദേവി, പി. ലീല, യൂസഫലി കേച്ചേരി, സി. രാധാകൃഷ്ണന്, സ്വാമി ചിദാനന്ദപുരി, കെ.എസ്. ചിത്ര, പി. നാരായണക്കുറുപ്പ്, കലാമണ്ഡലം ഗോപി ആശാന്, പി. വേണുഗോപാല് തുടങ്ങിയ പ്രമുഖര് ജന്മാഷ്ടമി പുരസ്കാരത്തിന് അര്ഹരായിട്ടുണ്ട്.
വാര്ത്താസമ്മേളനത്തില് പുരസ്കാര നിര്ണയ സമിതി ചെയര്മാന് ഡോ. എ.എം. ഉണ്ണികൃഷ്ണന്, ഡോ. ജെ. പ്രമീളാദേവി, ബാലസംസ്കാര കേന്ദ്രം ചെയര്മാന് പി.കെ. വിജയരാഘവന്, ബാലഗോകുലം സംസ്ഥാന പൊതുകാര്യദര്ശി ബി.എസ്. ബിജു, ബാലഗോകുലം തിരുവനന്തപുരം ജില്ലാ അധ്യക്ഷന് ജി.എസ്. ബാബുരാജ്, കാര്യദര്ശി കെ. സുനില് എന്നിവര് പങ്കെടുത്തു.
