ന്യൂഡൽഹി : ജന്ദർമന്ദറിൽ നടന്ന പ്രതിഷേധത്തിൽ വിദ്യാർത്ഥികൾക്ക് അനുകൂല നിലപാടെടുത്ത രാഹുൽ റാഞ്ചിയിൽ നടക്കുന്ന പ്രതിഷേധത്തിൽ എന്ത് നിലപാട് എടുക്കുന്നുവെന്ന് സമരക്കാർ അടുത്തിടെ ചോദിച്ചിരുന്നു. മിക്ക മാധ്യമങ്ങളും ഇത് വാർത്തയാക്കുകയും ചെയ്തിരുന്നു. അതുകൊണ്ട് തന്നെ ഇപ്പോൾ ഗത്യന്തരമില്ലാതെ വിദ്യാർത്ഥികൾക്ക് പിന്തുണ അറിയിച്ചും , ഹേമന്ത് സോറൻ സർക്കാരിനെ തള്ളിയും രംഗത്തെത്തിയിരിക്കുകയാണ് രാഹുൽ.
. “ജാർഖണ്ഡിൽ പ്രതിഷേധിക്കുന്ന വിദ്യാർത്ഥികൾക്കെതിരെ ബലപ്രയോഗം നടത്തുന്നത് തെറ്റാണ്. സമാധാനപരമായി പ്രതിഷേധിക്കാൻ വിദ്യാർത്ഥികൾക്ക് അവകാശമുണ്ട്, ചർച്ചയിലൂടെ മാത്രമേ പരിഹാരം കണ്ടെത്താൻ കഴിയൂ. ജാർഖണ്ഡ് സർക്കാർ ഈ വിദ്യാർത്ഥികളെ ശ്രദ്ധിക്കുകയും എല്ലാ പ്രശ്നങ്ങളും ഉടൻ പരിഹരിക്കുകയും വേണം” എന്നാണ് രാഹുലിന്റെ പ്രസ്താവന.
‘ ജാർഖണ്ഡിലെ വിദ്യാർത്ഥികൾക്കുള്ള ഞങ്ങളുടെ സന്ദേശം വ്യക്തമാണ്. സമാധാനപരമായി പ്രതിഷേധിക്കുന്ന വിദ്യാർത്ഥികൾക്കെതിരായ അക്രമാസക്തമായ ആക്രമണങ്ങളെ ഞങ്ങൾ എതിർക്കുന്നു ‘ എന്നും രാഹുൽ പറഞ്ഞു. ജന്ദർമന്ദർ പ്രതിഷേധത്തിന്റെ പേരിൽ മോദി സർക്കാരിനെതിരെ വെല്ലുവിളികളുമായി വന്ന രാഹുൽ റാഞ്ചിയിലെ പ്രതിഷേധത്തിൽ കാണിക്കുന്ന ഇരട്ടത്താപ്പ് ആദ്യം മുതൽ തന്നെ വ്യക്തമായിരുന്നു. ഇപ്പോൾ നിൽക്കക്കള്ളിയില്ലാതെയാണ് രാഹുൽ പ്രസ്താവന ഇറക്കിയിരിക്കുന്നതെന്നാണ് സൂചന.
