കാസര്‍കോട്: കുമ്പള, മഞ്ചേശ്വരം ഉപജില്ലകളിലെ സ്‌കൂളുകളില്‍ സോഷ്യല്‍ സയന്‍സ് ക്ലബ്ബിന്റെ നേതൃത്വത്തില്‍ നടന്ന ഫ്രീഡം ക്വിസ് 2026 സ്‌കൂള്‍തല മത്സരത്തിന്റെ എല്‍പി
വിഭാഗം ചോദ്യത്തിന്റെ പേരില്‍ അദ്ധ്യാപകനെ സസ്‌പെന്‍ഡ് ചെയ്ത നടപടിയില്‍ പ്രതിഷേധം ശക്തമാകുന്നു. കുമ്പള ഉപജില്ലയിലെ പള്ളത്തടുക്ക എയുപിഎസിലെ അദ്ധ്യാപകന്‍ ഗുരുപ്രസാദിനെ സര്‍വീസില്‍ നിന്ന് സസ്‌പെന്‍ഡ് ചെയ്യാനാണ് പൊതുവിദ്യാഭ്യാസ ഡയറക്ടര്‍ (ഡിജിഇ) ഉത്തരവിട്ടത്.
ആഗസ്ത് ആറിന് നടന്ന മത്സരത്തിലെ എല്‍പി വിഭാഗം ക്വിസ് മത്സരത്തില്‍ ‘ബ്രിട്ടീഷുകാരുടെ കൈയില്‍ നിന്നും ഏറ്റവും കൂടുതല്‍ ശിക്ഷ ലഭിച്ച സ്വാതന്ത്ര്യ സമര സേനാനി ആരാണ്’ എന്ന ചോദ്യത്തിന് വി.ഡി. സവര്‍ക്കര്‍ എന്ന് ഉത്തരമായി നല്‍കിയതാണ് കുറ്റമായി കണക്കാക്കുന്നത്. ഗൗരവകരമായ വീഴ്ചയാണെന്ന് വിലയിരുത്തിയാണ് നടപടി.
പള്ളത്തടുക്ക എയുപിഎസിലെ അദ്ധ്യാപകനായ ഗുരുപ്രസാദിന്റെയും മറ്റ് ചില അദ്ധ്യാപകരുടെയും നേതൃത്വത്തിലാണ് ഈ ചോദ്യപേപ്പര്‍ തയാറാക്കിയതെന്ന് കാസര്‍കോട് വിദ്യാഭ്യാസ ഉപഡയറക്ടര്‍ (ഡിഡിഇ) നടത്തിയ അന്വേഷണത്തില്‍ കണ്ടെത്തിയിരുന്നു. ഇതിന്റെ അടിസ്ഥാനത്തില്‍ സമര്‍പ്പിച്ച അന്വേഷണ റിപ്പോര്‍ട്ടിന്റെ തുടര്‍ച്ചയായാണ് നടപടി സ്വീകരിച്ചിരിക്കുന്നത്.
ഈ സംഭവം വിദ്യാഭ്യാസ വകുപ്പ് മന്ത്രി എന്‍. ഷംസുദ്ദീന്റെ ശ്രദ്ധയില്‍പ്പെടുത്തിയതിനെ തുടര്‍ന്ന് അടിയന്തര ഇടപെടല്‍ ഉണ്ടാവുകയായിരുന്നു. 1958ലെ കേരള വിദ്യാഭ്യാസ ആക്ട് 12 (എ) പ്രകാരം കണ്‍കറന്റ് അധികാരം ഉപയോഗിച്ച് ഗുരുപ്രസാദിനെ അടിയന്തരമായി സേവനത്തില്‍ നിന്ന് വിലക്കുന്നതിനും, കേരള വിദ്യാഭ്യാസ നിയമം (കെഇആര്‍) അധ്യായം 14 (എ) ചട്ടം 75 പ്രകാരം അദ്ധ്യാപകനെതിരെ വകുപ്പുതല അച്ചടക്ക നടപടി സ്വീകരിക്കാന്‍ മാനേജര്‍ക്ക് നിര്‍ദേശം നല്‍കാനും കാസര്‍കോട് വിദ്യാഭ്യാസ ഉപ ഡയറക്ടറെ ചുമതലപ്പെടുത്തിയിട്ടുണ്ട്. വിഷയത്തില്‍ വിശദമായ അന്വേഷണം നടത്തി അടിയന്തരമായി റിപ്പോര്‍ട്ട് സമര്‍പ്പിക്കാനും പൊതുവിദ്യാഭ്യാസ ഡയറക്ടര്‍ നിര്‍ദേശിച്ചിട്ടുണ്ട്. അതേസമയം ഫ്രീഡം ക്വിസിന്റെ ചോദ്യവും ഉത്തര സൂചികയും തയയ്യാറാക്കിയത് താനല്ലെന്നും കോണ്‍ഗ്രസ് അനുകൂല സംഘടനയില്‍പ്പെട്ട അദ്ധ്യാപകരാണെന്നും താന്‍ ഇത് ഡിഡിഇക്ക് അയച്ചു കൊടുക്കുക മാത്രമാണ് ചെയ്തതെന്നും ഗുരുപ്രസാദ് പറഞ്ഞു.
