തിരുവനന്തപുരം: മ്യൂള് അക്കൗണ്ടുകള്ക്കെതിരെ ജാഗ്രത പാലിക്കണമെന്ന് പോലീസ്. സൈബര് കുറ്റവാളികള് തട്ടിപ്പിലൂടെ കൈക്കലാക്കുന്ന പണം സുരക്ഷിതമായി മാറ്റിയെടുക്കാന് വ്യക്തികളുടെ അറിവോടുകൂടിയോ അല്ലാതെയോ ഉപയോഗിക്കുന്ന വാടക ബാങ്ക് അക്കൗണ്ടുകളാണ് മ്യൂള് അക്കൗണ്ടുകള്.
പലപ്പോഴും ഇത്തരത്തില് വഞ്ചിക്കപ്പെടുന്നവര് വിദ്യാര്ത്ഥികളും സാധാരണക്കാരുമായിരിക്കും തട്ടിപ്പിന്റെ വ്യാപ്തിയെക്കുറിച്ച് അറിവില്ലാത്തതും എളുപ്പത്തില് കുറച്ചധികം പണം ലഭിക്കുമെന്ന വാഗ്ദാനത്തില് വീണു പോകാന് സാധ്യത ഉള്ളവരുമാണ് ഈ വിഭാഗത്തിലേറെയും. ഈ സാധ്യതയാണ് ചൂഷണം ചെയ്യുന്നത്.
നിങ്ങളുടെ അക്കൗണ്ടിലൂടെ പണമിടപാടുകള് നടത്തുന്നതിന് കമ്മീഷനോ കൂലിയോ ലഭിക്കുന്ന ജോലി വാഗ്ദാനം ചെയ്ത് ആരെങ്കിലും സമീപിച്ചാല് അവരെ കുറിച്ചുള്ള വിവരം സ്ഥലത്തെ പോലീസ് സ്റ്റേഷനിലോ 1930 എന്ന ടോള്ഫ്രീ നമ്പറിലോ അറിയിക്കുക.സ്വന്തം അക്കൗണ്ട് വിവരങ്ങളോ വ്യക്തിഗത വിവരങ്ങളോ അപരിചിതരുമായി പങ്കുവെയ്ക്കരുത്. നിങ്ങളറിയാതെ അനധികൃതമായി നിങ്ങളുടെ അക്കൗണ്ടില് പണം ലഭിച്ചാല് ഉടന്തന്നെ നിങ്ങളുടെ ബാങ്കിനെയും പോലീസിനെയും വിവരം രേഖാമൂലം അറിയിക്കുക. ഇത്തരത്തില് ലഭിക്കുന്ന പണം പിന്വലിക്കുകയോ മറ്റു അക്കൗണ്ടുകളിലേക്ക് കൈമാറ്റം ചെയ്യുകയോ ചെയ്യരുത്. ബാങ്ക് അക്കൗണ്ടുകളുടെ പൂര്ണ്ണ ഉത്തരവാദിത്വം അക്കൗണ്ട് ഉടമകള്ക്കായിരിക്കും. അനധികൃതമായി സ്വന്തം അക്കൗണ്ടില് പണം സ്വീകരിക്കുന്നതും കൈമാറ്റം ചെയ്യുന്നതും കുറ്റകരമാണ്.
ബാങ്ക് അക്കൗണ്ടുകള് ഒരാളുടെ സ്വകാര്യതയാണ് ദുരുപയോഗം ചെയ്യാതെ വിവേകത്തോടും സുരക്ഷിതമായും ഉപയോഗിക്കുക.
