കോഴിക്കോട്: സംസ്ഥാന ശിശുക്ഷേമ സമിതിയുടെ സംരക്ഷണയില്‍ പ്രവര്‍ത്തിക്കുന്ന അമ്മത്തൊട്ടിലുകളില്‍ 1001-ാമത്തെ കുഞ്ഞ് എത്തിച്ചേര്‍ന്നു.കോഴിക്കോട് ബീച്ച് ആശുപത്രിക്ക് സമീപത്തെ അമ്മത്തൊട്ടിലില്‍ ശനിയാഴ്ച ഉച്ചയ്‌ക്ക് 1.30-ഓടെയാണ് രണ്ട് മാസം പ്രായവും 4.200 കിലോഗ്രാം ഭാരവുമുള്ള പെണ്‍കുഞ്ഞിനെ കണ്ടെത്തിയത്.കഴിഞ്ഞ ആഗസ്റ്റില്‍ പൊതുജനങ്ങള്‍ക്കായി തുറന്നുകൊടുത്ത ഈ അമ്മത്തൊട്ടിലില്‍ എത്തുന്ന 11-ാമത്തെ കുഞ്ഞാണ് ഇത്.
ആയിരാമത്തെ കുഞ്ഞായ ‘സഹസ്ര’ യുടെ പിന്‍ഗാമിക്ക് ‘സഹസ്രിക’ എന്ന് പേരിട്ടതായി സംസ്ഥാന ശിശുക്ഷേമ സമിതി ജനറല്‍ സെക്രട്ടറി അഡ്വ. ജിഎല്‍. അരുണ്‍ ഗോപി അറിയിച്ചു.ഈ വര്‍ഷം അമ്മത്തൊട്ടിലുകളിലെത്തുന്ന 13-ാമത്തെ കുഞ്ഞും ആറാമത്തെ പെണ്‍കുഞ്ഞുമാണ് ‘സഹസ്രിക’. കഴിഞ്ഞ ജൂണ്‍ 4-ന് ‘ഹരിതാംശ്’ എന്ന ആണ്‍കുഞ്ഞിനെ ഇവിടെ ലഭിച്ചിരുന്നു.
കുഞ്ഞ് അമ്മത്തൊട്ടിലിലെത്തിയ ഉടന്‍ തൊട്ടിലിനോട് ചേര്‍ന്നുള്ള ബീച്ച് ആശുപത്രി നഴ്‌സിംഗ് സ്റ്റേഷനില്‍ അലാറം മുഴങ്ങുകയും പിന്നാലെ നഴ്‌സിംഗ് ഉദ്യോഗസ്ഥര്‍ സ്ഥലത്തെത്തി കുഞ്ഞിനെ ഏറ്റെടുത്ത് തീവ്ര പരിചരണ വിഭാഗത്തിലേക്ക് മാറ്റുകയും ചെയ്തു. ഡോക്ടര്‍മാരുടെ പ്രാഥമിക പരിശോധനയില്‍ പൂര്‍ണ ആരോഗ്യവതിയാണ് കുഞ്ഞെന്ന് കണ്ടെത്തി.
2002-ല്‍ തിരുവനന്തപുരത്ത് തുടങ്ങിയ അമ്മത്തൊട്ടിലില്‍ ചൊവ്വാഴ്ച പുലര്‍ച്ചെ ആയിരാമത്തെ അതിഥി ‘സഹസ്ര’ എത്തിയതിന് പിന്നാലെയാണ്, ആധുനിക സൗകര്യങ്ങളോടെ നവീകരിച്ച കോഴിക്കോട് ബീച്ച് ആശുപത്രിക്ക് സമീപത്തെ അമ്മത്തൊട്ടിലില്‍ ഒരു കുഞ്ഞ് കൂടി എത്തിയത്.
