കൊച്ചി: ഒമ്പത് മാസം മുന്പ് ഇരു കൈകളും നഷ്ടപ്പെട്ട ജീവിതത്തില് നിന്ന് പ്രതീക്ഷയുടെ പുതിയ അധ്യായത്തിലേക്ക് കടന്നുവന്ന തമിഴ്നാട് സേലം സ്വദേശിയായ ഗോകുല പ്രിയന്, തന്റെ ജന്മദിനത്തില് വീണ്ടും കൊച്ചി അമൃത ആശുപത്രിയിലെത്തി. ഇക്കുറി ഒരു രോഗിയായല്ല, സ്വന്തം കൈകള് കൊണ്ട് ജീവിതം തിരിച്ചുപിടിച്ച യുവാവായാണ് അദ്ദേഹം ആശുപത്രിയിലെത്തിയത്.
തന്റെ ജീവിതത്തിന് പുതിയ അര്ഥം നല്കിയ, കൈ മാറ്റിവക്കല് ശസ്ത്രക്രിയ (Hand Transplant) രംഗത്തെ രാജ്യത്തെ പ്രമുഖ വിദഗ്ധനും അമൃത ആശുപത്രിയിലെ ഹെഡ് ആന്ഡ് നെക്ക്, പ്ലാസ്റ്റിക് ആന്ഡ് ക്രാനിയോഫേഷ്യല് സര്ജറി വിഭാഗം മേധാവിയുമായ ഡോ. സുബ്രഹ്മണ്യ അയ്യര്ക്കും ടീമിനൊപ്പവുമാണ് ഗോകുല പ്രിയന് ഇത്തവണ തന്റെ ജന്മദിന കേക്ക് മുറിച്ചത്.
2025 ഒക്ടോബര് 22 നാണ് ഡോ. സുബ്രഹ്മണ്യ അയ്യരുടെയും സംഘത്തിന്റെയും നേതൃത്വത്തില് ഗോകുലപ്രിയന്റെ ഇരുകൈകളും വിജയകരമായി മാറ്റിവച്ചത്. ശബരിമല ദര്ശനത്തിനിടെ മസ്തിഷ്കമരണം സംഭവിച്ച പൂജപ്പുര സെന്ട്രല് ജയിലിലെ ജയിലര് അനീഷ് എ. ആറിന്റെ കുടുംബം മഹത്തായ മനസോടെ ദാനം ചെയ്ത കൈകളാണ് ഗോകുല പ്രിയന് പുതിയ ജീവിതം സമ്മാനിച്ചത്. 2018 ല് ഹൈടെന്ഷന് വൈദ്യുത ലൈനില് നിന്ന് ഷോക്കേറ്റ് ഇരുകൈകളും നഷ്ടപ്പെട്ട ഗോകുല പ്രിയന് വര്ഷങ്ങളോളം കൃത്രിമ കൈകളോടെയായിരുന്നു ജീവിച്ചത്.
ജന്മദിനത്തോടനുബന്ധിച്ച് ആശുപത്രിയിലെത്തിയ ഗോകുല പ്രിയന്, തനിക്ക് പുതിയ ജീവിതം സമ്മാനിച്ച ഡോക്ടര്മാരെയും ചികിത്സാ സംഘത്തെയും നേരില് കണ്ട് നന്ദി അറിയിച്ചു. തുടര്ന്ന് തന്റെ മാറ്റിവച്ച കൈകള് ഉപയോഗിച്ച് കുടുംബാംഗങ്ങള്ക്കും, ഹാന്ഡ് ട്രാന്സ്പ്ലാന്റ് ടീമംഗങ്ങള്ക്കുമൊപ്പം ജന്മദിന കേക്ക് മുറിച്ചത് ചടങ്ങില് പങ്കെടുത്തവര്ക്ക് വികാരനിര്ഭരമായ നിമിഷമായി മാറി. കൈമാറ്റ ശസ്ത്രക്രിയയുടെ വിജയം ശസ്ത്രക്രിയയില് മാത്രം ഒതുങ്ങുന്നതല്ലെന്നും, രോഗിയുടെ ആത്മവിശ്വാസവും തുടര്ച്ചയായ പുനരധിവാസ പരിശീലനവും കുടുംബത്തിന്റെ പിന്തുണയും ചേര്ന്നാണ് ഇത്തരം നേട്ടങ്ങള് സാധ്യമാകുന്നതെന്നും ഡോ. സുബ്രഹ്മണ്യ അയ്യര് പറഞ്ഞു.
പതിനൊന്ന് വര്ഷങ്ങള്ക്കു മുന്പ് ഭാരതത്തില് കൈമാറ്റ ശസ്ത്രക്രിയയ്ക്ക് തുടക്കം കുറിച്ച അമൃത ആശുപത്രി ഇന്ന് ലോകത്ത് ഏറ്റവും കൂടുതല് കൈമാറ്റ ശസ്ത്രക്രിയകള് വിജയകരമായി നടത്തിയ കേന്ദ്രമായി മാറിയിരിക്കുകയാണ്.
