കാഞ്ഞങ്ങാട്: അമ്പലത്തറയില് അമീബിക് മസ്തിഷ്കജ്വരം സ്ഥിരീകരിച്ചതോടെ പ്രദേശത്ത് പരിഭ്രാന്തി. അമ്പലത്തറ പോലീസ് സ്റ്റേഷന് പരിധിയില് താമസിക്കുന്ന 18കാരനാണ് രോഗബാധിതനായത്. മീങ്ങോത്ത് ഉദയംപാറ സ്വദേശികളായ സതീശന് ശ്രീജ ദമ്പതികളുടെ മകന് ആദിത്യന് ആണ് മംഗലാപുരം കെ.എം.സി ആശുപത്രിയില് ഗുരുതരാവസ്ഥയില് ചികിത്സയിലുള്ളത്.
തിങ്കളാഴ്ച നടത്തിയ ലാബ് പരിശോധനയിലാണ് അമീബയുടെ സാന്നിധ്യം സ്ഥിരീകരിച്ചത്. ഒരാഴ്ച മുമ്പ് ആദിത്യനും സുഹൃത്തുക്കളും അമ്പലത്തറ ടൗണിലെ പൊതുകുളത്തില് കുളിച്ചിരുന്നു. ഇതിന്റെ അടിസ്ഥാനത്തിലാണ് ജില്ലാ ആരോഗ്യവകുപ്പും പോലീസും സംയുക്തമായി കുളത്തില് കുളിക്കുന്നതിന് വിലക്ക് ഏര്പ്പെടുത്തിയത്. കഴിഞ്ഞ ഒരാഴ്ചയ്ക്കുള്ളില് ഈ കുളത്തില് കുളിച്ച എല്ലാവരും ഉടന് തന്നെ ആരോഗ്യ കേന്ദ്രത്തില് പരിശോധന നടത്തണം. അടുത്ത അറിയിപ്പ് ഉണ്ടാകുന്നത് വരെ കുളത്തില് ഇറങ്ങുന്നത് കര്ശനമായി ഒഴിവാക്കണം.
തലവേദന, ഉയര്ന്ന പനി, ഛര്ദ്ദി, കഴുത്ത് വേദന, മൂക്കില് നിന്ന് വെള്ളം വരിക* തുടങ്ങിയ ലക്ഷണങ്ങള് ഉണ്ടായാല് ഉടന് ആശുപത്രിയില് എത്തണമെന്ന് ആരോഗ്യവകുപ്പ് നിര്ദ്ദേശിച്ചിട്ടുണ്ട്. സ്കൂള് വിദ്യാര്ത്ഥികള്, യുവാക്കള്, യാത്രക്കാര് എന്നിവര് പതിവായി ഉപയോഗിക്കുന്ന കുളമാണ് ഇത്. റോഡരികില് വാഹനം നിര്ത്തി കുളിക്കാനെത്തുന്നവരും ഏറെയുണ്ട്. മലിനമായ തടാകങ്ങളിലെയും കുളങ്ങളിലെയും വെള്ളം മൂക്കിലൂടെ ശരീരത്തിലെത്തുന്നതിലൂടെയാണ് ഈ രോഗം പകരുന്നത്.
സമയബന്ധിതമായ ചികിത്സ അത്യാവശ്യമാണ്. ആദിത്യന് കൃത്യമായി ഈ കുളത്തില് തന്നെയാണ് കുളിച്ചതെന്ന് ഇതുവരെ സ്ഥിരീകരിച്ചിട്ടില്ലെങ്കിലും, മുന്കരുതല് എന്ന നിലയിലാണ് ആരോഗ്യവകുപ്പിന്റെ കര്ശന നിര്ദ്ദേശം.
