കോഴിക്കോട്: കാണാതായ യുവാവിനെ വാടക വീട്ടില് മരിച്ച നിലയില് കണ്ടെത്തി. കോഴിക്കോട് മുണ്ടുപാലത്ത് ഇരിങ്ങല്ലൂർ സ്വദേശി ഷരീഖ് ആണ് മരിച്ചത്. രണ്ടുദിവസം മുമ്പ് വീട്ടില് നിന്നുപോയ ഇയാള് തിരികെ എത്തിയിരുന്നില്ല. മരണത്തില് ദുരൂഹതയുണ്ടെന്ന് പോലീസ് പറയുന്നു. മുണ്ടുപാലത്തെ വാടക വീട്ടില് ഇന്നലെ അർദ്ധരാത്രിയോടെയാണ് ഷരീഖിനെ മരിച്ച നിലയില് കണ്ടെത്തിയത്.
ഷെരീഖിന്റെ സുഹൃത്താണെന്നുപറഞ്ഞ് പന്തീരാങ്കാവ് പോലീസില് ഒരാള് വിവരം അറിയിക്കുകയായിരുന്നു. ശേഷം പോലീസ് സ്റ്റേഷനില് നേരിട്ടെത്തിയും ഇയാള് വിവരം അറിയിച്ചു. മുഹമ്മദ് അഷ്റഫ് എന്നാണ് തന്റെ പേരെന്നും ഷരീഖിനെ മർദ്ദിച്ചുവെന്നുമാണ് ഇയാള് പോലീസിനോട് പറഞ്ഞത്. തുടർന്ന് പോലീസ് സ്ഥലത്തെത്തി പരിശോധിച്ചപ്പോഴാണ് ഷരീഖിന്റെ മൃതദേഹം തറയില് കിടക്കുന്ന നിലയില് കണ്ടെത്തിയത്.
ഷരീഖ് എങ്ങനെയാണ് മുണ്ടുപാലത്തെത്തിയതെന്ന് പോലീസ് പരിശോധിക്കുകയാണ്. അഷ്റഫിനെ ചോദ്യം ചെയ്യുന്നുണ്ട്. ഇയാള് കസ്റ്റഡിയില് തുടരുകയാണ്. ഇരുവരും ലഹരി ഉപയോഗിച്ചിരുന്നോയെന്നും പോലീസ് അന്വേഷിക്കുന്നുണ്ട്. ഷരീഖിന്റെ മൃതദേഹത്തില് രക്തക്കറയൊന്നും കണ്ടില്ലെന്നാണ് ലഭിക്കുന്ന വിവരം.
