ലണ്ടന്: അഹ്മദിയ്യാ മുസ്ലിം ജമാഅത്തിന്റെ 60-ാമത് ആഗോള വാര്ഷിക സമ്മേളനമായ ‘ജല്സ സാലാന’ ഹാംപ്ഷയറിലെ ഹദീഖത്തുല് മഹ്ദിയില് സമാപിച്ചു. നൂറിലധികം രാജ്യങ്ങളില് നിന്നായി 50,000 ത്തിലധികം പ്രതിനിധികള് മൂന്ന് ദിവസത്തെ ആത്മീയ സംഗമത്തില് പങ്കെടുത്തു.
വിശ്വാസികള് തങ്ങളുടെ ഓരോ വാക്കിലും പ്രവര്ത്തിയിലും ദൈവഭയം പുലര്ത്തണമെന്ന് സമാപന സമ്മേളനത്തെ അഭിസംബോധന ചെയ്ത അഹ്മദിയ്യാ മുസ്ലിം ജമാഅത്തിന്റെ ആഗോള നേതാവ് ഹദ്റത്ത് മിര്സാ മസ്റൂര് അഹ്മദ് സാഹിബ് ആഹ്വാനം ചെയ്തു. അസത്യം പറയാതെ ജീവിക്കാന് കഴിയില്ലെന്ന ധാരണ സമൂഹത്തില് വര്ദ്ധിച്ചുവരികയാണെങ്കിലും, വ്യക്തിപരവും സാമൂഹികവും അന്തര്ദേശീയവുമായ അനേകം പ്രശ്നങ്ങളുടെ മൂലകാരണം അസത്യമാണെന്ന് അദ്ദേഹം ചൂണ്ടിക്കാട്ടി. ഇന്നത്തെ ലോകരാഷ്ട്രീയത്തില് പോലും അസത്യത്തെ അടിസ്ഥാനമാക്കി രാജ്യങ്ങള് പരസ്പരം അനീതികളും അധിനിവേശങ്ങളും നടത്തുന്നതായി അദ്ദേഹം പരാമര്ശിച്ചു.
വിവിധ രാജ്യങ്ങളില് നിന്നുള്ള പാര്ലമെന്റ് അംഗങ്ങള്, നയതന്ത്രജ്ഞര്, മത-സാമൂഹിക നേതാക്കള് തുടങ്ങിയ പ്രമുഖരും സമ്മേളനത്തില് പങ്കെടുത്തു. കേരളത്തില് നിന്നുള്ള പ്രതിനിധി സംഘവും സമ്മേളനത്തില് സജീവമായി പങ്കെടുത്തു. വേദിയില് കേരളത്തില് നിന്നുള്ള പ്രതിനിധികള്ക്ക് മലയാള ഗാനം ആലപിക്കാനുള്ള അവസരവും ലഭിച്ചതായി ജനറല് സെക്രട്ടറി ബി.എ. മുഹമ്മദ് നജീബ് അറിയിച്ചു.
