ന്യൂദൽഹി: ഞാൻ എസി മുറിയിലിരുന്ന് പൊതു പ്രവർത്തനം നടത്തുന്നയാളല്ലെന്ന് രാജിവെച്ച കേന്ദ്രമന്ത്രി ധർമ്മേന്ദ്രപ്രധാൻ.
നീറ്റ് പരീക്ഷയിലെ ക്രമക്കേടുകൾക്കെതിരെ ഉയർന്ന പ്രക്ഷോഭങ്ങളുടെ ഭാഗമായാണ് വിദ്യാഭ്യാസ വകുപ്പ് ചുമതല വഹിച്ചിരുന്ന പ്രധാൻ രാജിവെച്ചത്.
പാർലമെന്റ് ഇടനാഴിയിൽ കോൺഗ്രസ്സ് നേതാവും മുൻ മന്ത്രിയുമായ ജയറാം രമേശുമായി സംസാരിക്കവേയാണ് പ്രധാന്റെ പ്രതികരണം. ‘ഒന്നും സംഭവിക്കുന്നില്ല. ഞാൻ ഒരു തെരുവ് പോരാളിയാണ്, എസി റൂം ആക്ടിവിസ്റ്റല്ല,’ ഒഡീഷയിലെ സാംബൽപൂരിൽ നിന്നുള്ള ലോക്സഭാംഗമായ പ്രധാൻ പറഞ്ഞു.
രാജിവച്ചതിന് ശേഷമുള്ള പ്രധാന്റെ ആദ്യ പ്രതികരണമാണിത്. വിദ്യാഭ്യാസ പരിഷ്കാരങ്ങൾ കൊണ്ടുവരുന്നതിനും ഭാരതത്തിലെ യുവാക്കളുടെ സ്വപ്നങ്ങൾ സാക്ഷാത്കരിക്കുന്നതിനും താൻ അഗാധമായി പ്രതിജ്ഞാബദ്ധനാണെന്ന് അദ്ദേഹം രാജിക്കത്തിൽ പറഞ്ഞിരുന്നു. വിദ്യാഭ്യാസ മന്ത്രിയായി സേവനമനുഷ്ഠിക്കാൻ അവസരം നൽകിയതിന് പ്രധാനമന്ത്രി നരേന്ദ്ര മോദിയോട് നന്ദിയും പറഞ്ഞിരുന്നു.
നീറ്റ് ചോദ്യപേപ്പർ ചോർച്ചയെക്കുറിച്ച്, സർക്കാർ ഉടൻ തന്നെ അന്വേഷണം സെൻട്രൽ ബ്യൂറോ ഓഫ് ഇൻവെസ്റ്റിഗേഷന് (സിബിഐ) കൈമാറിയതായും പുനപ്പരീക്ഷ വിജയകരമായി നടത്തിയതായും പ്രധാൻ പറഞ്ഞു. ‘ഈ സാഹചര്യത്തിൽ നിന്ന് ഒരിക്കലും പിന്മാറിയിട്ടില്ല. ഒരു വിദ്യാർത്ഥിയുടെയും മെറിറ്റ് കഴിവുകൾ ‘പരീക്ഷാ മാഫിയയ്ക്ക്’ നശിപ്പിക്കാൻ അവസരമുണ്ടാകരുതെന്ന് അദ്ദേഹം കൂട്ടിച്ചേർത്തു.
‘ജന്തർ മന്തറിലെയും മറ്റ് പ്രദേശങ്ങളിലേയും സ്ഥിതി കണക്കിലെടുത്ത്, ദേശവിരുദ്ധ ശക്തികൾ അത് ചൂഷണം ചെയ്യുന്നത് തടയുക, ദേശീയ ഐക്യം സംരക്ഷിക്കുക, ഒറ്റ വിദ്യാർത്ഥിയുടെയും ഭാവി നിയമപരമായ സങ്കീർണതകളിൽ കുടുങ്ങിപ്പോകുന്നില്ലെന്ന് ഉറപ്പാക്കുക, നമ്മുടെ കുട്ടികൾ പഠനത്തിനായി സമയം ചെലവഴിക്കാനും അവരുടെ കരിയർ കെട്ടിപ്പടുക്കുന്നതിൽ ശ്രദ്ധ കേന്ദ്രീകരിക്കാനും അനുവദിക്കുക എന്നീ ലക്ഷ്യങ്ങളോടെ, വേണ്ടതുചെയ്യാനുള്ള സാഹചര്യം സുഗമമാക്കാനാണ് ഞാൻ പ്രധാനമന്ത്രിക്ക് രാജി സമർപ്പിച്ചത്,’ അദ്ദേഹം പറഞ്ഞു.
