അസം മുഖ്യമന്ത്രി ഹിമന്ത ബിശ്വ ശര്മ്മ ദുരിതാശ്വാസ ക്യാമ്പിലെ കുടുംബങ്ങളുമായി സംവദിക്കുകയും വെള്ളപ്പൊക്കം മൂലമുണ്ടായ ബുദ്ധിമുട്ടുകള് വിലയിരുത്തുകയും ചെയ്യുന്നു
ഗുവാഹത്തി: അസമിലെ പ്രളയബാധിതര്ക്കായി സംസ്ഥാന ബിജെപി 12 കോടിയുടെ ദുരിതാശ്വാസ പദ്ധതി പ്രഖ്യാപിച്ചു. പാര്ട്ടി പ്രവര്ത്തകരില് നിന്ന് തുക സമാഹരിച്ച് പ്രളയബാധിത കുടുംബങ്ങള്ക്ക് വസ്ത്രങ്ങളും മറ്റ് അവശ്യസാധനങ്ങളും വിതരണം ചെയ്യുമെന്ന് മുഖ്യമന്ത്രി ഹിമന്ത ബിശ്വ ശര്മ അറിയിച്ചു.
സംസ്ഥാനത്ത് പ്രളയത്തില് മരിച്ചവരുടെ എണ്ണം 66 ആയി ഉയര്ന്ന സാഹചര്യത്തിലാണ് ബിജെപി ദുരിതാശ്വാസ പ്രവര്ത്തനം ശക്തമാക്കിയത്. പ്രളയത്തില് ഏറ്റവും കൂടുതല് ദുരിതമനുഭവിക്കുന്ന കുടുംബങ്ങള്ക്ക് സഹായം എത്തിക്കുകയാണ് ലക്ഷ്യമെന്ന് മുഖ്യമന്ത്രി വ്യക്തമാക്കി. രണ്ട് ലക്ഷം സ്ത്രീകള്ക്ക് പരമ്പരാഗത അസമീസ് വസ്ത്രം നല്കുന്നതിനും രണ്ട് ലക്ഷം കുട്ടികള്ക്ക് വസ്ത്രങ്ങള് വിതരണം ചെയ്യുന്നതിനുമാണ് പദ്ധതി. ഇതിനായി പാര്ട്ടി പ്രവര്ത്തകര് സംസ്ഥാനവ്യാപകമായി ഫണ്ട് സമാഹരിക്കും.
അതേസമയം, പ്രളയബാധിത പ്രദേശങ്ങളിലെ സ്ഥിതിഗതികള് പ്രധാനമന്ത്രി നരേന്ദ്ര മോദി തുടര്ച്ചയായ രണ്ടാം ദിവസവും വിലയിരുത്തി. ദുരിതാശ്വാസ-പുനരധിവാസ പ്രവര്ത്തനങ്ങള്ക്ക് കേന്ദ്രത്തിന്റെ പൂര്ണ പിന്തുണ ഉണ്ടാകുമെന്ന് അദ്ദേഹം അസം സര്ക്കാരിനെ അറിയിച്ചു.
സംസ്ഥാനത്തെ ആറു ജില്ലകളിലായി 6.5 ലക്ഷത്തിലധികം ആളുകള് ഇപ്പോഴും പ്രളയബാധിതരായി തുടരുകയാണ്. ജലനിരപ്പ് ചിലയിടങ്ങളില് താഴ്ന്നുതുടങ്ങിയെങ്കിലും രക്ഷാപ്രവര്ത്തനവും ദുരിതാശ്വാസ വിതരണവും തുടരുകയാണ്.
