ഗ്ലാസ്‌ഗോ: കോമണ്‍വെല്‍ത്ത് ഗെയിംസിന്റെ 23-ാം പതിപ്പിന് ഇന്ന് തുടക്കം. ഗ്ലാസ്‌ഗോയില്‍ രാവിലെയോടെ (ഭാരത സമയം ഉച്ച തിരിഞ്ഞ്) മത്സരങ്ങള്‍ ആരംഭിക്കും. ഇന്ന് ലോന്‍ ബൗള്‍സ് ഗ്രൂപ്പ് ഘട്ട പോരാട്ടങ്ങളാണ് നടക്കുക. ഭാരതത്തിന്റെ പുരുഷ-വനിതാ ബൗള്‍സ് ടീമുകള്‍ ഇന്ന് ആദ്യ മത്സരത്തിനിറങ്ങും. പാരാ ബൗള്‍സ് മത്സരങ്ങളും ഇന്ന് നടക്കും. രാത്രി 10.30 മുതലാണ് ഉദ്ഘാടന ചടങ്ങുകള്‍ നടക്കുക. ദി ഓവോ ഹൈഡ്രോ സ്റ്റേഡിയത്തിലാണ് വര്‍ണാഭമായ ഉദ്ഘാടന ചടങ്ങുകള്‍.
ഇന്നു മുതല്‍ അടുത്ത 11 ദിവസത്തേക്കാണ് ഗ്ലാസ്‌ഗോ നഗരത്തിന്റെ രാവും പകലും ഒന്നാക്കിക്കൊണ്ട് കായിക പോരാട്ടങ്ങള്‍ അരങ്ങേറുക. കോമണ്‍വെല്‍ത്ത് അസോസിയേഷന് കീഴിലുള്ള 74 രാജ്യങ്ങളില്‍ നിന്നുള്ള കായിക താരങ്ങളില്‍ പലര്‍ക്കും ഇത് വരാനിരിക്കുന്ന ലോസ് ആഞ്ചലസ് ഒളിംപിക്‌സ് 2028ന് ഒരുങ്ങാനുള്ള വേദിയാണ്. മൂവായിരത്തില്‍ പരം താരങ്ങളാണ് ഈ ദിവസങ്ങളില്‍ വിവിധ കായിക ഇനങ്ങളിലായി പോരടിക്കുന്നത്. ഒന്നാം ദിവസമായ ഇന്ന് ഗെയിംസുകളോടെ ആരംഭിച്ച് 27 മുതല്‍ ട്രാക്ക് ആന്‍ഡ് ഫീല്‍ഡ് ഇനങ്ങളുടെ വീറും വാശിയും കൂടി കാണാനാകും. ആഗസ്ത് രണ്ടിന് അവസാനിക്കുന്ന ഗെയിംസില്‍ 215 മത്സരങ്ങളാണ് ആകെ നടക്കുക.
ഏഴ് വേദികളിലായാണ് മത്സരങ്ങള്‍ നടക്കുക. സ്‌കോട്ട്‌സ്റ്റൗണ്‍ സ്റ്റേഡിയത്തിലായിരിക്കും അത്‌ലറ്റിക്‌സ് മത്സരങ്ങള്‍. നീന്തല്‍ മത്സരങ്ങള്‍ ട്രോള്‍ ക്രോസ് ഇന്റര്‍നാഷണല്‍ സ്വിമ്മിങ് സെന്ററില്‍ നടക്കും. ഉദ്ഘാടന, സമാപന ചടങ്ങുകള്‍ നടക്കുന്ന ഹൈഡ്രോ സ്‌റ്റേഡിയത്തില്‍ നെറ്റ്‌ബോള്‍ മത്സരം മാത്രമാണ് നടക്കുക. കോമണ്‍വെല്‍ത്ത് ഗെയിംസിന്റെ ചരിത്രത്തില്‍ ആദ്യമായാണ് ഉദ്ഘാടന ചടങ്ങ് ഇന്‍ഡോര്‍ സ്‌റ്റേഡിയത്തില്‍ നടക്കുന്നത്.
ഉദ്ഘാടന ചടങ്ങ് രാത്രി 10.30ന്
കോമണ്‍വെല്‍ത്ത് ഗെയിംസിന്റെ ഉദ്ഘാടന ചടങ്ങ് ആരംഭിക്കുന്നത് ഭാരത സമയം രാത്രി 10.30നാണ്. ഗ്ലാസ്‌ഗോയിലെ സ്‌കോട്ടിഷ് ഇവന്റ് കാമ്പസിന്റെ ഭാഗമായുള്ള ഇന്‍ഡോര്‍ സ്‌റ്റേഡിയം ദി ഓവോ ഹൈഡ്രോയിലാണ് ഗെയിംസ് പരേഡും വര്‍ണാഭമായ ചടങ്ങുകളും നടക്കുക.
മിരാബായിയും ലവ്‌ലിനയും നയിക്കും
ഭാരതത്തിന്റെ ഒളിംപിക്‌സ് മെഡല്‍ ജേതാക്കളായ മിരാബായി ചാനുവും ലവ്‌ലിന ബോര്‍ഗോഹെയ്‌നും ഉദ്ഘാടന ചടങ്ങിന്റെ പരേഡില്‍ ഭാരത പതാകയേന്തി സംഘത്തെ മുന്നില്‍ നിന്ന് നയിക്കും.
കലാപ്രകടനങ്ങള്‍
സ്‌കോട്ടിഷ് ഗായകന്‍ കെ.ടി. ടണ്‍സ്റ്റാള്‍, ഫോക്ക് സംഗീതജ്ഞന്‍ നഥാന്‍ ഇവാന്‍സ്, പ്രമുഖ മ്യൂസിക് ഗ്രൂപ്പ് സെയിന്റ് പിഎച്ച്എന്‍എക്‌സ് എന്നിവരുടെ അവതരണങ്ങളുണ്ടാകും.
ഉദ്ഘാടനം ചെയ്യുന്നത് കിങ് ചാള്‍സ് മൂന്നാമന്‍
ബ്രിട്ടീഷ് രാജാവ് കിങ് ചാള്‍സ് മൂന്നാമനും പത്‌നി കാമില്ല രാജ്ഞിയുമായിരിക്കും ഉദ്ഘാടന ചടങ്ങിലെ പ്രധാന അതിഥികള്‍. ചാള്‍സ് മൂന്നാമന്‍ ആയിരിക്കും ഗെയിംസ് ഔദ്യോഗികമായി ഉദ്ഘാടനം ചെയ്യുക.
മത്സരങ്ങളും ചടങ്ങുകളും തത്സമയം വീക്ഷിക്കാന്‍ സോണി സ്‌പോര്‍ട്‌സ് ടെന്‍ 2 എസ് ഡി, എച്ച് ഡി, സോണി സ്‌പോര്‍ട്‌സ് ടെന്‍ 4
