സംസ്ഥാനത്ത് സ്വർണവിലയിൽ വീണ്ടും വൻ വർധനവ്. തുടർച്ചയായ ആറാം ദിവസവും ഉയർന്ന സ്വർണവില ഈ മാസത്തെ ഏറ്റവും ഉയർന്ന നിരക്കിലെത്തി. ഇന്ന് ഗ്രാമിന് 70 രൂപയും പവന് 560 രൂപയുമാണ് വർധിച്ചത്. ഇതോടെ ഒരു ഗ്രാം സ്വർണത്തിന് 13,500 രൂപയും പവന് 1,08,000 രൂപയുമായി നിരക്ക് ഉയർന്നു. ജൂലൈ ഒന്നാം തീയതി 1,03,240 രൂപയായിരുന്ന പവൻ വിലയാണ് ദിവസങ്ങൾക്കുള്ളിൽ ഈ ഉയർന്ന നിരക്കിലേക്ക് എത്തിയത്.
കഴിഞ്ഞ ദിവസങ്ങളിലും സ്വർണവിലയിൽ വലിയ മുന്നേറ്റമാണ് രേഖപ്പെടുത്തിയത്. ചൊവ്വാഴ്ച പവന് 560 രൂപയും ബുധനാഴ്ച ഒറ്റയടിക്ക് 1,680 രൂപയും വർധിച്ചിരുന്നു. തുടർച്ചയായി ഉണ്ടാകുന്ന ഈ വലിയ കുതിച്ചുകയറ്റം സ്വർണം വാങ്ങാൻ പദ്ധതിയിടുന്ന സാധാരണക്കാർക്ക് വലിയ തിരിച്ചടിയാണ് നൽകുന്നത്. ഈ വർഷം ജനുവരി 29-നായിരുന്നു സ്വർണത്തിന് എക്കാലത്തെയും ഉയർന്ന വില രേഖപ്പെടുത്തിയത് (ഗ്രാമിന് 16,395 രൂപ, പവന് 1,31,160 രൂപ).
രാജ്യാന്തര വിപണിയിൽ സ്വർണവില ഔൺസിന് 22 ഡോളർ താഴ്ന്ന് 4,123 ഡോളറിലെത്തുകയും, ഇന്ത്യൻ രൂപയുടെ മൂല്യം ഡോളറിനെതിരെ 96.49 ലേക്ക് ഉയരുകയും ചെയ്തിട്ടും സംസ്ഥാനത്ത് സ്വർണവില താഴേക്ക് വരാത്തത് വിപണിയിലെ കൗതുകമായി മാറിയിട്ടുണ്ട്.ജൂണ് മാസത്തില് രാജ്യത്തിന്റെ ആഭരണ കയറ്റുമതി കഴിഞ്ഞ വര്ഷത്തെ അപേക്ഷിച്ച് 26 ശതമാനം ഉയര്ന്ന് മികച്ച വളര്ച്ചയാണ് രേഖപ്പെടുത്തിയത്. ആഗോള വിപണിയിലെ ആവശ്യകത വര്ധിച്ചതാണ് ഈ മുന്നേറ്റത്തിന് പ്രധാന കാരണം.
