കൊച്ചി: ഹിറ്റ് ആന്‍ഡ് റണ്‍ അപകട കേസുകളില്‍ കുറ്റവാളികളെയും വാഹനങ്ങളെയും കണ്ടെത്തുന്നതിന് എല്ലാ ജില്ലകളിലും പ്രത്യേക സ്‌ക്വാഡുകള്‍ രൂപീകരിക്കാന്‍ ഹൈക്കോടതി സംസ്ഥാന പോലീസ് മേധാവിക്ക് നിര്‍ദ്ദേശം നല്‍കി. ഇത്തരം കേസുകള്‍ പലപ്പോഴും പരിഹരിക്കപ്പെടാതെ പോകുന്നുവെന്ന് ജസ്റ്റിസ് ജി ഗിരീഷ് ചൂണ്ടിക്കാട്ടി.
മറ്റ് വാഹനങ്ങളിലെ യാത്രക്കാരെയോ, കാല്‍നടയാത്രക്കാരെയോ അബദ്ധത്തിലോ മനഃപൂര്‍വ്വമോ ഇടിച്ചു വീഴ്‌ത്തിയ ശേഷം നിയമത്തിന്റെ പരിധിയില്‍ നിന്ന് രക്ഷപ്പെടുന്ന കുറ്റവാളികളെ പിടികൂടുന്നതിനായി ഓരോ ജില്ലകളിലും പ്രത്യേക സ്‌ക്വാഡുകള്‍ രൂപീകരിക്കാന്‍ ഇനിയും വൈകിക്കൂട. ഇത്തരം കേസുകളില്‍ ഫലപ്രദമായ അന്വേഷണം അനിവാര്യമാണ്. സൈബര്‍ പോലീസ് ഉള്‍പ്പെടെയുള്ള മുഴുവന്‍ സേനയുടെയും ഏകോപിത ശ്രമങ്ങളും സാങ്കേതികവിദ്യയുടെ ഉപയോഗവും ഇക്കാര്യത്തില്‍ ആവശ്യമാണെന്നും കോടതി പറഞ്ഞു.
