തിരുവനന്തപുരം: മൃഗശാലയിലെ ബംഗാള് കടുവ ‘ബബിത’യ്ക്ക് അര്ബുദം സ്ഥിരീകരിച്ചു. കടുവയ്ക്ക് കീമോതെറാപ്പി നല്കിത്തുടങ്ങി. ‘അഡിനോ കാര്സിനോമ’ എന്ന അപൂര്വവും മാരകവുമായ അര്ബുദമാണ് ബബിതയ്ക്ക് പിടിപെട്ടിരിക്കുന്നത്.
2024 മാര്ച്ചിലാണ് സൗത്ത് വയനാട് ഫോറസ്റ്റ് ഡിവിഷനിലെ ജനവാസമേഖലയില് ഭീതി പരത്തിയ ഈ പെണ്കടുവയെ വനം വകുപ്പ് പിടികൂടുന്നത്. തുടര്ന്ന് തിരുവനന്തപുരം മൃഗശാലയിലേക്ക് മാറ്റി ‘ബബിത’ എന്ന് പേരിട്ടു. ഏതാനും മാസങ്ങള്ക്ക് മുമ്പ് തന്നെ രോഗം സ്ഥിരീകരിച്ചിരുന്നെങ്കിലും കൃത്യമായ ചികിത്സാമാര്ഗങ്ങള് ഇല്ലാത്തതിനാല് പാലിയേറ്റീവ് കെയര് നല്കി വരികയായിരുന്നു.
എന്നാല് അടുത്തിടെ ആരോഗ്യനില കൂടുതല് വഷളായതോടെ,വിദഗ്ധ സംഘം നിര്ദേശിച്ച പ്രകാരം കീമോതെറാപ്പി ആരംഭിക്കാന് മൃഗശാല അധികൃതര് തീരുമാനിക്കുകയായിരുന്നു.
ശരീരത്തില് പടര്ന്നുപിടിക്കുന്ന രീതിയിലുള്ള അര്ബുദമാണെന്നതിനാല് ശസ്ത്രക്രിയ വഴി ഇത് നീക്കം ചെയ്യാന് സാധിക്കില്ലെന്ന് ഡോക്ടര്മാര് പറഞ്ഞു.
