ന്യൂദൽഹി: ഭാരതം പുതിയ ഉയരങ്ങളിലേക്ക് കുതിക്കുകയാണെന്ന് പ്രധാനമന്ത്രി നരേന്ദ്രമോദി. ദേശീയ-അന്തർദ്ദേശീയ തലങ്ങളിലും ഇപ്പോൾ ബഹിരാകാശ രംഗത്തും ഓരോ പൗരനും അഭിമാനം നൽകുന്ന നേട്ടങ്ങളുടെ ഒരു പരമ്പരയ്‌ക്കാണ് രാജ്യം സാക്ഷ്യം വഹിച്ചതെന്ന് അദ്ദേഹം പറഞ്ഞു. പാർലമെന്റിന്റെ വർഷകാല സമ്മേളനത്തിന്റെ ആദ്യദിനമായ ഇന്ന്, സഭാ നടപടികൾ ആരംഭിക്കുന്നതിന് മുന്നോടിയായി മാധ്യമങ്ങളോട് സംസാരിക്കുകയായിരുന്നു പ്രധാനമന്ത്രി.
കഴിഞ്ഞ വർഷകാല സമ്മേളനത്തിന് തൊട്ടുമുമ്പാണ് ഒരു ഇന്ത്യൻ പൗരൻ അന്താരാഷ്‌ട്ര ബഹിരാകാശ നിലയത്തിൽ എത്തിയത്. എന്നാൽ കഴിഞ്ഞ ദിവസമാകട്ടെ, ഒരു യുവ ഇന്ത്യൻ സ്റ്റാർട്ടപ്പ് ബഹിരാകാശ രംഗത്ത് വൻ നേട്ടം കൈവരിച്ചു. വളരെ കുറച്ചു രാജ്യങ്ങളിൽ മാത്രം കാണുന്ന സ്വകാര്യ സംരംഭകത്വ മികവാണ് ഇന്ത്യയിലെ യുവാക്കൾ ബഹിരാകാശ മേഖലയിൽ പ്രകടിപ്പിച്ചത്, പ്രധാനമന്ത്രി വ്യക്തമാക്കി.
ബഹിരാകാശത്തോളം അതിരുകളില്ലാത്തതാണ് രാജ്യത്തെ യുവാക്കളുടെ സ്വപ്നങ്ങളെന്നും ഇന്ത്യയുടെ ആഗോള പ്രതിച്ഛായ ലോകമെമ്പാടും അംഗീകരിക്കപ്പെടുന്നുണ്ടെന്നും അദ്ദേഹം കൂട്ടിച്ചേർത്തു. പാർലമെന്റിന്റെ വർഷകാല സമ്മേളനം ജനകീയ പ്രശ്നങ്ങൾ ചർച്ച ചെയ്യുന്നതിനായി പൂർണ്ണമായും പ്രയോജനപ്പെടുത്തണമെന്നും സഭാ നടപടികൾ ഫലപ്രദമായി മുന്നോട്ടു കൊണ്ടുപോകാൻ എല്ലാ രാഷ്‌ട്രീയ പാർട്ടികളും സഹകരിക്കണമെന്നും പ്രധാനമന്ത്രി ആഹ്വാനം ചെയ്തു.
അതേസമയം, അമേരിക്കയും ഇറാനും തമ്മിൽ പശ്ചിമേഷ്യയിൽ തുടരുന്ന ശക്തമായ സൈനിക സംഘർഷം ഇന്ത്യയ്‌ക്ക് വലിയ ബുദ്ധിമുട്ടുകൾ സൃഷ്ടിക്കുന്നതായും പ്രധാനമന്ത്രി പറഞ്ഞു. ഊർജ്ജ ഇറക്കുമതിക്കായി പശ്ചിമേഷ്യൻ രാജ്യങ്ങളെ പ്രധാനമായും ആശ്രയിക്കുന്ന ഇന്ത്യയെപ്പോലൊരു രാജ്യത്തിന് നിലവിലെ യുദ്ധസാഹചര്യം വലിയ വെല്ലുവിളിയാണ് ഉയർത്തുന്നതെന്ന് അദ്ദേഹം കൂട്ടിച്ചേർത്തു.
