കൊച്ചി: വ്യാജ യുഎസ് പ്രതിരോധ പദ്ധതിയുമായി ബന്ധപ്പെട്ട 700 കോടി രൂപയുടെ നിക്ഷേപ തട്ടിപ്പ് സംബന്ധിച്ച് സിബിഐ അന്വേഷണം ആവശ്യപ്പെട്ടുള്ള ഹര്ജിയില് ഹൈക്കോടതി സംസ്ഥാന പോലീസില് നിന്ന് റിപ്പോര്ട്ട് തേടി. പണം നഷ്ടപ്പെട്ട പൊതുമരാമത്ത് വകുപ്പിലെ റിട്ട. എക്സിക്യൂട്ടീവ് എഞ്ചിനീയര് എ ഹരികൃഷ്ണന് സമര്പ്പിച്ച ഹര്ജി
ആഗസ്റ്റ് 18-ന് പരിഗണിക്കാന് മാറ്റി. ലാഭകരമായ സബ് കോണ്ട്രാക്റ്റുകള്, യുഎസില് ജോലി അവസരങ്ങള്, കുടുംബാംഗങ്ങള്ക്ക് വിസ എന്നിവ വാഗ്ദാനം ചെയ്താണ് ഒരു കോടി രൂപ നിക്ഷേപിക്കാന് പ്രേരിപ്പിച്ചതെന്ന് ഹര്ജിക്കാരന് പറഞ്ഞു.
യുഎസ് സര്ക്കാരുമായി 83,000 കോടി രൂപയുടെ പ്രതിരോധ കരാര് നേടിയെന്ന് അവകാശപ്പെട്ടാണ് വിപിവിവി ടെക്നോ കണ്സ്ട്രക്ഷന് എന്ന കമ്പനി ഇന്ത്യയിലുടനീളമുള്ള നിക്ഷേപകരില് നിന്ന് 700 കോടിയോളം രൂപ തട്ടിയെടുത്തത്. എന്നാല് അത്തരമൊരു കരാര് നിലവിലില്ലെന്ന് പിന്നീട് വ്യക്തമായി. തട്ടിപ്പിന് രാജ്യാന്തര സ്വഭാവമുള്ളതിനാല് നിലവില് തിരുവനന്തപുരം മെഡിക്കല് കോളേജ് പോലീസ് അന്വേഷണം നടത്തുന്ന കേസ് സിബിഐക്ക് കൈമാറണമെന്നാണ് ഹര്ജിക്കാരന്റെ ആവശ്യം.
