കൊല്ലം: സമഗ്രശിക്ഷാ കേരളയുടെ (ഇന്ക്ലൂസീവ് എജുക്കേഷന്) വിവിധ സംസ്ഥാന, ജില്ലാ, ബ്ലോക്ക് തല തസ്തികകളിലേക്കുള്ള യോഗ്യതാ മാനദണ്ഡങ്ങളില് സര്ക്കാര് ഭേദഗതി വരുത്തി ഉത്തരവിറക്കിയതിനെ തുടര്ന്ന് ഹയര് സെക്കന്ഡറി അദ്ധ്യാപകര്ക്ക് അവസരങ്ങള് കുറയുന്നതായി പരാതി.
ഹയര്സെക്കന്ഡറി അദ്ധ്യാപകരുടെ നിലവാരത്തില് ഇരിക്കേണ്ട പോസ്റ്റുകളിലേക്ക് പ്രൈമറി, ഹൈസ്കൂള് അദ്ധ്യാപകരെ പരിഗണിക്കുന്നതാണ് പ്രധാന വിഷയം. നിലവില് ഹയര് സെക്കന്ഡറി പ്രിന്സിപ്പല്മാര്ക്കും എച്ച്എസ്എസ്ടിമാര്ക്കും അവകാശപ്പെട്ടിരുന്ന തസ്തികകളിലേക്ക് കൂടുതല് വിഭാഗങ്ങളെ ഉള്പ്പെടുത്തിയിരിക്കുകയാണ്. ഇത് യോഗ്യതകളെ ചൊല്ലിയുള്ള വാക്കുതര്ക്കങ്ങള്ക്ക് കാരണമാകുന്നു.
ടിടിസി മാത്രമുള്ള അദ്ധ്യാപകര്ക്കും ഹയര്സെക്കന്ഡറി തലങ്ങളിലേക്ക് അപേക്ഷിക്കാമെന്നത് മറ്റൊരു ന്യൂനതയാണ്. എച്ച്എസ്എസ്ടിമാരുടെയും പ്രിന്സിപ്പല്മാരുടെയും അവസരങ്ങള് ഇതുമൂലം കുറയുമെന്നാണ് ആശങ്ക.
ഹയര് സെക്കന്ഡറി വിഭാഗത്തിലെ അദ്ധ്യാപകരുടെ അക്കാദമിക മികവും സേവനപരിചയവും അവഗണിക്കപ്പെടുകയാണെന്ന് അദ്ധ്യാപകര് തന്നെ ചൂണ്ടിക്കാട്ടുന്നു. ഹയര്സെക്കന്ഡറി വരെയുള്ള അദ്ധ്യാപകര്ക്ക് ട്രയിനിങ് കൊടുക്കുന്ന പ്രോഗ്രാമാണിത് എന്നിരിക്കെ ഹയര് സെക്കന്ഡറി അദ്ധ്യാപകര്ക്ക് പ്രൈമറി അദ്ധ്യാപകര് ട്രയിനിങ് നല്കുന്ന സാഹചര്യം ഉണ്ടാകും. ഇത് അക്കാദമിക നിലവാരത്തെ ബാധിക്കും.
പ്രൈമറി അദ്ധ്യാപകര് നല്കുന്ന നിര്ദേശങ്ങള് പ്രിന്സിപ്പല്മാര്ക്ക് ബാധകമാകുന്ന സാഹചര്യം വരും. ഇതോടെ എച്ച്എസ്എസ്ടിമാരെയും പ്രിന്സിപ്പല്മാരെയും തസ്തികകളില് നിന്ന് ഒഴിവാക്കാന് എളുപ്പമാകും. ഹയര് സെക്കന്ഡറി മേഖലയ്ക്ക് അവകാശപ്പെട്ട തസ്തികകളുടെ യോഗ്യതാ മാനദണ്ഡങ്ങള് ദുര്ബലപ്പെടുത്തുന്ന നടപടിയെന്നാണ് പൊതുവേയുള്ള ആരോപണം.
നിലവില് പ്രസിദ്ധീകരിച്ച ഉത്തരവില് പറഞ്ഞിരിക്കുന്ന യോഗ്യതകള് പ്രകാരം അപേക്ഷ നല്കുന്നതിന് പലര്ക്കും സാധിക്കാതെ വരുന്നു എന്നാണ് ആരോപണം.
ഉത്തരവില് ചില അദ്ധ്യാപക സംഘടനകളുടെ മാത്രം ആവശ്യങ്ങളും ശുപാര്ശകളും പരിഗണിച്ചാണ് യോഗ്യതാ മാനദണ്ഡങ്ങളില് മാറ്റം വരുത്തിയതെന്നും പരാതിയുണ്ട്.
ജന്മഭൂമി ഓണ്ലൈന്