മുംബൈ: ടാറ്റാ ഗ്രൂപ്പിന്റെ ധനകാര്യ സ്ഥാപനമായ ടാറ്റാ ക്യാപിറ്റല് തൃശൂര് ജില്ലയിലെ അന്തിക്കാട്ടുള്ള സ്വര്ണ്ണപ്പണയക്കമ്പനിയായ യോഗക്ഷേമം ലോണ്സിനെ ഏറ്റെടുത്തു. റിസര്വ് ബാങ്കിന്റെ അംഗീകാരമുള്ള ഈ എന്ബിഎഫ്സി കമ്പനിയുടെ 88.6 ശതമാനം ഓഹരികളാണ് ടാറ്റ സ്വന്തമാക്കുന്നത്. ഈ ഇടപാട് പൂര്ത്തിയാകുന്നതോടെ യോഗക്ഷേമം ലോണ്സ് പൂര്ണമായും ടാറ്റാ ക്യാപിറ്റലിന്റെ ഉപകമ്പനിയായി മാറും.
ഇതുസംബന്ധിച്ച തീരുമാനത്തിന് ടാറ്റാ ക്യാപിറ്റല് ഡയറക്ടര് ബോര്ഡ് അംഗീകാരം നല്കി. തൃശൂര് ജില്ലയിലെ ഒരു ചെറിയ ഗ്രാമമായിരുന്ന അന്തിക്കാട് നിന്നാണ് 1991ല് ‘യോഗക്ഷേമം കുറീസ് ആന്ഡ് ലോണ്സ്’ എന്ന പേരില് ഒരു ചെറിയ ധനകാര്യ സ്ഥാപനം ആരംഭിച്ചത്. ഇത് പിന്നീട് വളര്ന്നു. 2000ല് റിസര്വ് ബാങ്കിന്റെ എന്ബിഎഫ്സി ലൈസന്സ് കമ്പനിക്ക് ലഭിച്ചു.
2012ല് ‘യോഗക്ഷേമം ലോണ്സ് ലിമിറ്റഡ്’ എന്ന് പേരുമാറ്റി. ക്രമേണ സ്വര്ണപ്പണയത്തിലും ചെറുകിട ബിസിനസ് വായ്പകളിലും ശ്രദ്ധ കേന്ദ്രീകരിച്ചു. സാധാരണക്കാരെയും ചെറുകിട വ്യാപാരികളെയുമാണ് ഇവര് പ്രധാനമായും ലക്ഷ്യമിടുന്നത്.
നിലവില് ദക്ഷിണേന്ത്യയിലാകെ 160ലധികം ശാഖകളാണ് ഈ മലയാളി കമ്പനിക്കുള്ളത്.
