സുൽത്താൻ ബത്തേരി: പോക്സോ കേസിൽ ഗുണ്ടാത്തലവൻ ശാഖിഷ് കുമ്പാളി അറസ്റ്റിൽ. ബത്തേരിയിലെ റിസോർട്ട് വളഞ്ഞാണ് പ്രതിയെ എലത്തൂർ പോലീസ് പിടികൂടിയത്. പതിനാറുകാരിയെ ലഹരി നൽകി പീഡിപ്പിച്ച കേസിലെ പ്രതിയാണ്.
കോഴിക്കോട് നഗരത്തിലെ ലഹരി വിൽപന നടത്തുന്നവരിൽ പ്രധാനിയാണ് ഇയാൾ. കാപ്പ അടക്കം പ്രതിക്കെതിരെ പതിനഞ്ചോളം കേസുകൾ നിലവിലുണ്ട്. കഴിഞ്ഞ കുറച്ചു നാളുകളായി ഇയാളെ പിടികൂടാനുള്ള ശ്രമത്തിലായിരുന്നു പോലീസ്. പതിനാറുകാരിയെ പീഡിപ്പിച്ച കേസിൽ അന്വേഷണ സംഘം ഇയാളുടെ വീട്ടിൽ നിന്നും ആയുധങ്ങളടക്കം പിടികൂടിയിരുന്നു. പിന്നീട് ഒരു ലഹരിക്കേസുമായുള്ള അന്വേഷണത്തിനിടെ വാഹനം ഉപേക്ഷിച്ച് ഇയാൾ പോലീസിന്റെ കൈയിൽ നിന്നും രക്ഷപ്പെട്ടിരുന്നു.
ഇയാൾക്കായി തെരച്ചിൽ തുടരുന്നതിനിടെയാണ് ബത്തേരിയിലെ ഹോട്ടലിൽ ഒളിച്ചു താമസിക്കുന്നുവെന്ന വിവരം പോലീസിന് കിട്ടുന്നത്. കോഴിക്കോട് നഗരത്തിലെ ഗുണ്ടാ പട്ടികയിൽപ്പെടുന്ന പ്രധാനിയാണ് ശാഖിഷ്. 25 വായസുമാത്രമാണ് ഇയാൾക്ക് പ്രായം. കഴിഞ്ഞ മാസമാണ് 16കാരിയായ പെൺകുട്ടിയെ ലഹരിമരുന്ന് നൽകി വിവിധ ലോഡ്ജുകളിൽ കൊണ്ടുപോയി പീഡിപ്പിച്ചത്. ഈ സംഭവത്തിൽ കേസെടുത്തതോടെ ഇയാൾ ഒളിവിൽ പോവുകയായിരുന്നു.
