തിരുവനന്തപുരം: നിയമനത്തട്ടിപ്പില് അന്വേഷണത്തിന്റെ ഭാഗമായി പി എസ് സിക്ക് രേഖകള് ആവശ്യപ്പെട്ട് കത്ത് നല്കി ക്രൈംബ്രാഞ്ച്.പി എസ് സി ഓഫീസില് ഉദ്യോഗസ്ഥര് നേരിട്ട് എത്തിയാണ് കത്ത് നല്കിയത്. ചോദ്യപേപ്പര്, ഉത്തര സൂചിക, ഉദ്യോഗാര്ത്ഥികളുടെ പട്ടിക, അഭിമുഖത്തിന് വിളിച്ചവര്, ഓണ്സ്ക്രീന് മാര്ക്കിംഗിന്റെ വിശദാംശങ്ങള് തുടങ്ങിയ രേഖകളാണ് ആവശ്യപ്പെട്ടത്.
ആസൂത്രണ ബോര്ഡിലെ മൂന്ന് നിയമനങ്ങളിലേക്ക് പരീക്ഷ എഴുതിയ നാല് പേരുടെ മൊഴിയും തെളിവുകളും അന്വേഷണ സംഘം ശേഖരിച്ചിരുന്നു.ഇതിനിടെ പത്ത് വകുപ്പുകളിലും കൂടി നിയമനത്തട്ടിപ്പ് നടന്നെന്നുളള പരാതികള് ക്രൈംബ്രാഞ്ചിന് ലഭിച്ചു.
രഹസ്യസ്വഭാവമുള്ള രേഖകള് സ്ഥാപനത്തിനുളള പരിരക്ഷ ചൂണ്ടിക്കാട്ടി പി എസ് സി പുറത്തുനിന്നുള്ള ഏജന്സികള്ക്ക് നല്കാറില്ല. അതിനാല് ക്രൈംബ്രാഞ്ച് ആവശ്യപ്പെട്ടാലും പി എസ് സി എല്ലാ രേഖകളും നല്കുമോ എന്ന സംശയമുണ്ട്. ഈ സാഹചര്യത്തിലായിരുന്നു ഇന്നലെ വൈകിട്ട് ക്രൈംബ്രാഞ്ച് ഐ ജി അജിതാ ബീഗം, പി എസ് സി ചെയര്മാന് എംആര് ബൈജുവുമായി ഒരു മണിക്കൂറോളം ചര്ച്ച നടത്തിയത്. ഇതിന് പിന്നാലെയാണ് രേഖകള് ആവശ്യപ്പെട്ട് പി എസ് സിക്ക് കത്ത് നല്കിയത്.
