ന്യൂദല്‍ഹി: തങ്ങളുടെ കോമഡി ഷോയില്‍ ഭിന്നശേഷിക്കാരെ അപകീര്‍ത്തിപ്പെടുത്തിയ പരാമര്‍ശങ്ങളുമായി ബന്ധപ്പെട്ട കേസില്‍ കോടതി ഉത്തരവു ലംഘിച്ചതിന് സ്റ്റാന്‍ഡപ് കൊമേഡിയനും യൂട്യൂബറുമായ സമയ് റെയ്നയടക്കം അഞ്ചു പേര്‍ക്ക് സുപ്രീം കോടതി മൂന്ന് ലക്ഷം രൂപ വീതം പിഴ ചുമത്തി. കോടതി നേരത്തെ നല്‍കിയിരുന്ന നിര്‍ദ്ദേശങ്ങള്‍ നിരാകരിച്ചതിനാണ് ചീഫ് ജസ്റ്റിസ് സൂര്യകാന്ത് , ജസ്റ്റിസുമാരായ ജോയ്‌മല്യ ബാഗ്ചി , വി മോഹന എന്നിവരടങ്ങിയ ബെഞ്ച് പിഴ വിധിച്ചത്. സമയ് റെയ്ന ഈ കോടതിയുടെ ഉത്തരവുകള്‍ ധിക്കാരപൂര്‍വ്വം ലംഘിച്ചുവെന്നു വിശ്വസിക്കാന്‍ ഞങ്ങള്‍ക്ക് കാരണമുണ്ടെന്ന് കോടതി വ്യക്തമാക്കി.
വികലാംഗരുടെ ജീവിക്കാനുള്ള അവകാശത്തെയും അന്തസ്സിനെയും ലംഘിക്കുന്ന ഓണ്‍ലൈന്‍ ഉള്ളടക്കങ്ങള്‍ സംപ്രേഷണം ചെയ്യുന്നതു നിയന്ത്രിക്കണമെന്ന് ആവശ്യപ്പെട്ട് ക്യൂര്‍ എസ്എംഎ ഇന്ത്യ ഫൗണ്ടേഷന്‍ സമര്‍പ്പിച്ച ഹര്‍ജി പരിഗണിക്കുകയായിരുന്നു കോടതി. സ്പൈനല്‍ മസ്‌കുലാര്‍ അട്രോഫി വൈകല്യമുള്ള ഒരു വ്യക്തിയെ ഷോയില്‍ സമയ് റെയ്ന പരിഹസിച്ചതാണ് കേസിന് ആധാരം. കേസിനെത്തുടര്‍ന്ന് 2025 ല്‍, വികലാംഗരുടെ ചികിത്സയ്‌ക്കുള്ള ഫണ്ട് സ്വരൂപിക്കുന്നതിനായി മാസത്തില്‍ കുറഞ്ഞത് രണ്ട് പരിപാടികളെങ്കിലും സംഘടിപ്പിക്കാനും വികലാംഗരെ ആ പരിപാടികളില്‍ പങ്കുചേരാന്‍ പ്രേരിപ്പിക്കണമെന്നും സമയ് റെയ്നയോടും മറ്റ് സഹ സ്റ്റാന്‍ഡപ് കൊമേഡിയന്‍മാരോടും കോടതി നിര്‍ദ്ദേശിച്ചിരുന്നു. എന്നാല്‍ ഇന്ന് കേസ് പരിഗണിച്ചപ്പോള്‍, ഹര്‍ജിക്കാരന്റെ സംഘടനയ്‌ക്ക് വേണ്ടി ഹാജരായ അഭിഭാഷക, ആ കോടതി നിര്‍ദേശം പാലിച്ചിട്ടില്ലെന്ന് ചൂണ്ടിക്കാട്ടി. ഇതേത്തുടര്‍ന്നായിരുന്നു കോടതി രൂക്ഷമായി വിമര്‍ശിച്ചതും പിഴ ചുമത്തിയതും.
