തിരുവനന്തപുരം: ഉത്തരവ് അവഗണിച്ചും ആവര്‍ത്തിച്ചും റോഡു കുഴിക്കുന്ന നടപടിക്കെതിരെ ജലവിഭവ വകുപ്പ് പ്രിന്‍സിപ്പല്‍ സെക്രട്ടറിക്കും വാട്ടര്‍ അതോറിറ്റി മാനേജിങ് ഡയറക്ടര്‍ക്കും സമന്‍സ് അയയ്‌ക്കാന്‍ മനുഷ്യാവകാശ കമ്മിഷന്‍ ചെയര്‍പേഴ്‌സണ്‍ ജസ്റ്റിസ് അലക്‌സാണ്ടര്‍ തോമസ് ഉത്തരവിട്ടു.
ടാറിങ് പൂര്‍ത്തിയാക്കിയ റോഡുകള്‍ പോലും പൈപ്പ് അറ്റകുറ്റപ്പണിക്കായി ജല അതോറിറ്റി കുത്തിപൊളിക്കുകയാണെന്ന് നിരന്തരം പരാതി ഉയരുന്നതിനാല്‍, പരാതികള്‍ക്ക് ശാശ്വത പരിഹാരം കാണാന്‍ ഉന്നത ഉദ്യോഗസ്ഥരുടെ സ്‌പെഷല്‍ ടീം രൂപീകരിക്കണമെന്ന ഉത്തരവ് നടപ്പാക്കാനോ പുരോഗതി റിപ്പോര്‍ട്ട് സമര്‍പ്പിക്കാനോ തയാറാകാത്ത സാഹചര്യത്തിലാണ് സമന്‍സ് അയയ്‌ക്കുന്നത്. ആഗസ്ത് 4ന് കമ്മിഷന്‍ ആസ്ഥാനത്ത് നടക്കുന്ന സിറ്റിങ്ങില്‍ ജലവിഭവ വകുപ്പ് സെക്രട്ടറിക്ക് വേണ്ടി ജോയിന്റ് സെക്രട്ടറിയും എംഡിക്ക് വേണ്ടി ചീഫ് എന്‍ജിനീയറും ഹാജരാകണമെന്നും കമ്മിഷന്‍ നിര്‍ദേശിച്ചിട്ടുണ്ട്. 2024ലെ ഉത്തരവിന്റെ അടിസ്ഥാനത്തില്‍ സ്വീകരിച്ച നടപടികള്‍ മൂന്നാഴ്ചയ്‌ക്കകം അറിയിച്ചില്ലെങ്കില്‍ ജലവിഭവ വകുപ്പ് പ്രിന്‍സിപ്പല്‍ സെക്രട്ടറിക്കും വാട്ടര്‍ അതോറിറ്റി എംഡിക്കുമെതിരെ വാറണ്ട് ഉള്‍പ്പെടെയുള്ള നടപടിക്രമങ്ങള്‍ ആരംഭിക്കുമെന്നും ഉത്തരവില്‍ പറഞ്ഞു. വിഷയത്തിന്റെ പ്രാധാന്യം കണക്കിലെടുത്ത് അഡീഷണല്‍ അഡ്വക്കേറ്റ് ജനറല്‍ കെ.സി. വിന്‍സെന്റ് കേസില്‍ ഹാജരാകണമെന്നും കമ്മിഷന്‍ അഭ്യര്‍ത്ഥിച്ചു.
