കൊച്ചി:കശുവണ്ടി കോര്പ്പറേഷനിലെ അഴിമതിയില് കോടതിയെ അവഹേളിക്കുന്ന രീതിയില് പ്രോസിക്യൂഷന് അനുമതി ഉത്തരവിറക്കിയ ഐഎഎസ് ഉദ്യോഗസ്ഥനായ കെ ബിജു ഹൈക്കോടതിയില് നിരുപാധികം മാപ്പപേക്ഷിച്ചു.മാപ്പപേക്ഷ തയാറാക്കിയത് മനസിരുത്തി ചിന്തിച്ചാണോ എന്ന് സത്യവാംഗ്മൂലത്തിലില്ലെന്ന് പറഞ്ഞ് മാപ്പപേക്ഷ കോടതി മടക്കി.ഇക്കാര്യം വ്യക്തമാക്കി വീണ്ടും മാപ്പപേക്ഷ നല്കണം. കോടതിയ്ക്ക് എതിരെ പരമാര്ശം നടത്തിയാല് ഒരു സര്ക്കാരിനും സംരക്ഷിക്കാനാകില്ലെന്ന് ഉദ്യോഗസ്ഥന് ജഡ്ജി മുന്നറിയിപ്പും നല്കി
കോടതി സമ്മര്ദ്ദത്താല് ,മനസിരുത്തി ചിന്തിക്കാതെയാണ് കശുവണ്ടി കേസില് പ്രതികളെ വിചാരണ നടത്താനുള്ള പ്രോസിക്യൂഷന് അനുമതി നല്കുന്നതെന്നായിരുന്നു കെ ബിജു ഇറക്കിയ ഉത്തരവിലുണ്ടായിരുന്നത്.ഈ ഉദ്യോഗസ്ഥനോട് ഇന്ന് നേരിട്ട് ഹാജരാകാന് ജസ്റ്റിസ് എ ബദറുദ്ദീന് നിര്ദ്ദേശിച്ചത് പ്രകാരം കോടതിയില് ഹാജരായ കെ ബിജു നിരുപാധികം മാപ്പ് ചോദിച്ച് സത്യവാംഗ്മൂലം നല്കി. തെറ്റായ പദപ്രയോഗങ്ങള് പിന്വലിക്കുകയാണെന്നും തന്റെ നടപടി അനുചിതമായിപ്പോയെന്ന് ബോധ്യമുണ്ടെന്നും മാപ്പപേക്ഷ സ്വീകരിച്ച് കോടതിയലക്ഷ്യ നടപടി അവസാനിപ്പിക്കണമെന്നും കെ ബിജു അപേക്ഷിച്ചു.
എന്നാല്, കേസ് പരിഗണിച്ച കോടതി മാപ്പപേക്ഷ അംഗീകരിച്ചില്ല. ജനങ്ങളെ സേവിക്കാനാണ് ഐഎഎസുകാരെ തെരഞ്ഞെടുക്കുന്നതെന്ന് ഓര്ക്കണം.സര്ക്കാരിന്റെ ആയുധമാകരുതെന്നും കോടതി കെ ബിജുവിനെ ഓര്മ്മിപ്പിച്ചു.
ഐ എന് ടി യു സി സംസ്ഥാന അധ്യക്ഷന് ആര് ചന്ദ്രശേഖരനും കശു അണ്ടി വികസന കോര്പ്പറേഷന് എം ഡി ആയിരുന്ന ഡോ കെ എ രതീഷുമാണ് കേസിലെ പ്രധാന പ്രതികള്.
