കൊല്ലം: 2047ല് രാജ്യത്ത് സുസ്ഥിര വികസനം ലക്ഷ്യമാക്കി വിബി ജി റാം ജി തൊഴിലുറപ്പ് പദ്ധതിയെ മാറ്റും. ഇതിനായി ഓരോ ഗ്രാമപഞ്ചായത്തും വികസിത് ഗ്രാമപഞ്ചായത്ത് പദ്ധതി തയാറാക്കണം. 20 വര്ഷമായി രാജ്യത്ത് നടപ്പാക്കിയ ദേശീയ ഗ്രാമീണ തൊഴിലുറപ്പ് പദ്ധതിയിലെ അനുഭവങ്ങളുടെ പശ്ചാത്തലത്തിലാണ് ശാസ്ത്രീയവും ജനപങ്കാളിത്തപരവുമായ വികസന ആസൂത്രണം ഉറപ്പാക്കുന്നതിനായി വിബി ജി റാം ജിയില് വികസിത് ഗ്രാമപഞ്ചായത്ത് പദ്ധതികള്ക്ക് പ്രാധാന്യം നല്കുന്നത്.
ഗ്രാമപഞ്ചായത്ത് തലത്തിലാണ് വികസിത് ഗ്രാമ പഞ്ചായത്ത് പ്ലാന് (വിജിപിപി) തയാറാക്കേണ്ടത്. വിജിപിപി അംഗീകരിക്കുന്നതോടെ വിബി ജി റാം ജിയില് ഏറ്റെടുക്കുന്ന എല്ലാ പ്രവൃത്തികളും ഇതില് നിന്നും മാത്രമാകും. പദ്ധതിയില് പ്രവൃത്തികള് ഏറ്റെടുക്കുന്നതിനുള്ള പ്രധാന ആസൂത്രണ രേഖയാണ് വികസിത് ഗ്രാമപഞ്ചായത്ത് പ്ലാന്. ഓരോ ഗ്രാമപഞ്ചായത്തിന്റെയും വികസന ആവശ്യങ്ങളും അടിസ്ഥാനസൗകര്യ കുറവുകളും ജനങ്ങളുടെ മുന്ഗണനകളും തെളിവുകളുടെ അടിസ്ഥാനത്തില് ശാസ്ത്രീയമായി വിലയിരുത്തി വികസന പ്രവര്ത്തനങ്ങള് നിശ്ചയിക്കുന്നതിനാണ് ഇതിലൂടെ ലക്ഷ്യമിടുന്നത്.
ഗ്രാമപഞ്ചായത്തുകള് നിരവധി ചര്ച്ചകള്ക്കും കൂടിയാലോചനകള്ക്കും ശേഷം തയാറാക്കുന്ന വിജിപിപി ഗ്രാമസഭയുടെ അംഗീകാരത്തോടെയാണ് നടപ്പാക്കേണ്ടത്. നിയമപ്രകാരം വിബി ജി റാം ജിയില് നടപ്പാക്കുന്ന എല്ലാ വികസന പ്രവര്ത്തനങ്ങളും അംഗീകൃത വിജിപിപിയില് ഉള്പ്പെട്ടവ മാത്രമായിരിക്കും.
ശാസ്ത്രീയവും തെളിവുകളുടെ അടിസ്ഥാനത്തിലുമുള്ള ആസൂത്രണം
ജനങ്ങള് ആവശ്യപ്പെടുന്നതനുസരിച്ച് നടപ്പാക്കുന്ന പദ്ധതി ആസൂത്രണരീതിയില് നിന്ന് മാറി, ഭൗമ വിവരസാങ്കേതികവിദ്യ (ജിഐഎസ്), റിമോട്ട് സെന്സിങ്, പിഎം ഗതി ശക്തി പ്ലാറ്റ്ഫോം, മറ്റ് ഡിജിറ്റല് പൊതുഅടിസ്ഥാന സംവിധാനങ്ങള് എന്നിവയുടെ സഹായത്തോടെ തെളിവ് അധിഷ്ഠിതവും വിഭവങ്ങളുടെ പരമാവധി പ്രയോജനപ്പെടുത്തലും ഉറപ്പാക്കുന്ന വികസന മാതൃകയാണ് പുതിയ സംവിധാനം.
ഗ്രാമപഞ്ചായത്ത് തലത്തില് തയ്യാറാക്കുന്ന പദ്ധതികള് ബ്ലോക്ക്, ജില്ലാ, സംസ്ഥാന, ദേശീയ തലങ്ങളിലേക്ക് സംയോജിപ്പിച്ച് വികസിത ഭാരത് ദേശീയ ഗ്രാമീണ അടിസ്ഥാനസൗകര്യ ശൃംഖലയിലേക്ക് ബന്ധിപ്പിക്കും. ദേശീയ വികസന ലക്ഷ്യങ്ങളുമായി യോജിച്ച രീതിയിലാണ് ഈ ശൃംഖല ക്രമീകരിച്ചിരിക്കുന്നത്. ജലസുരക്ഷയും ജലസംരക്ഷണവുമായി ബന്ധപ്പെട്ട പദ്ധതികള്, അടിസ്ഥാന ഗ്രാമീണ അടിസ്ഥാനസൗകര്യ വികസനം, ഉപജീവനമാര്ഗ വികസനവുമായി ബന്ധപ്പെട്ട അടിസ്ഥാനസൗകര്യങ്ങള്, കാലാവസ്ഥാ വ്യതിയാനവും അതിതീവ്ര കാലാവസ്ഥാ പ്രതിഭാസങ്ങളും നേരിടുന്നതിനുള്ള പ്രതിരോധ പ്രവര്ത്തനങ്ങള് എന്നീ നാല് പ്രധാന മേഖലകളെ കേന്ദ്രീകരിച്ചാണ് വികസന പ്രവര്ത്തനങ്ങള് ആസൂത്രണം ചെയ്യുന്നത്. ഓരോ ഗ്രാമപഞ്ചായത്തിന്റെയും നിലവിലുള്ള വികസനനിലയും പ്രാദേശിക ആവശ്യങ്ങളും പരിഗണിച്ച് വികസനപദ്ധതികള് തയ്യാറാക്കുന്നതിനുമാണ് വിബി ജി റാം ജി നിയമം പ്രാധാന്യം നല്കുന്നത്.
സംയോജനം പ്രധാനം
കേന്ദ്ര-സംസ്ഥാന സര്ക്കാരുകളുടെ വിവിധ വകുപ്പുകളുടെ പദ്ധതികളുമായി സംയോജനം ഉറപ്പാക്കി വിഭവങ്ങളുടെ ഫലപ്രദമായ വിനിയോഗവും സമഗ്രമായ ഗ്രാമീണവികസനവും കൈവരിക്കുകയും വിഭവങ്ങള് ഇരട്ടിപ്പില്ലാതെ കാര്യക്ഷമമായി ഉപയോഗിക്കുന്നതിനുമാണ് ഇതിലൂടെ ലക്ഷ്യമിടുന്നത്.
‘വികസിത് ഭാരത് @2047’ എന്ന ദേശീയ ദര്ശനത്തിന്റെ ഭാഗമായി, ഗ്രാമപഞ്ചായത്തുകളെ ഭാവിസജ്ജവും സുസ്ഥിരവും സമഗ്രവുമായ വികസനത്തിന്റെ കേന്ദ്രങ്ങളാക്കി മാറ്റുന്നതില് വികസിത് ഗ്രാമ പഞ്ചായത്ത് പ്ലാന് നിര്ണായക പങ്കുവഹിക്കുമെന്നാണ് കേന്ദ്ര ഗ്രാമവികസന മന്ത്രാലയം വിലയിരുത്തുന്നത്.
ജന്മഭൂമി ഓണ്ലൈന്