കല്പ്പറ്റ: മണ്ണിടിച്ചില് ദുരന്തത്തില് ജില്ലാ ഭരണകൂടത്തിന്റെ ഭാഗത്ത് നിന്ന് വന്നത് ഗുരുതര വീഴ്ച്ചയെന്നും സര്ക്കാര് ഈ വീഴ്ച്ച നിര്മാണ കമ്പനിയുടെ തലയില് കെട്ടിവെച്ച് രക്ഷപ്പെടാന് ശ്രമിക്കുകയുമാണെന്നും ആരോപണം.
നിലവില് മണ്ണിടിഞ്ഞ പ്രദേശത്ത് ഒരാഴ്ച്ചയ്ക്ക് മുന്നേ തന്നെ ചെറിയ രീതിയിലുള്ള മണ്ണിടിച്ചില് ഉണ്ടായിരുന്നു. ഇത് നാട്ടുകാര് അധികൃതരുടെ ശ്രദ്ധയില്പ്പെടുത്തിയിരുന്നു. എന്നാല് ജില്ലാ ദുരന്ത നിവാരണ അതോറിറ്റി കാര്യമായ ഇടപെടല് നടത്തിയില്ല. മണ്ണിടിച്ചിലിന് മുന്നേയുള്ള രണ്ട് ദിവസം കള്ളാടി മേഖലയില് അതിശക്തമായ മഴയാണുണ്ടായത്. എന്നാല് ദുരന്തം മുന്കൂട്ടി കാണാനാകാതെ ജില്ലാ കളക്ടര് ഡി.ആര്. മേഖശ്രീ നേതൃത്വം നല്കുന്ന ദുരന്ത നിവാരണ അതോറിറ്റി ഇതും അവഗണിച്ചു. അപകട ദിവസം രാവിലെ എട്ട് മണി മുതല് ചെറിയ രീതിയില് മണ്ണിടിച്ചില് നടന്നിരുന്നു ഇത് തിരിച്ചറിഞ്ഞ് ഇതിലേ ഒഴുകിയെത്തിയ വെള്ളം തിരിച്ചുവിടാന് വന്ന തൊഴിലാളികള് തന്നെയാണ് അപടകടത്തില്പ്പെട്ടത്. അപകടം നടന്ന ഉടനെ കളക്ടര് ഉള്പ്പെടെയുള്ളവര് സംഭവസ്ഥലത്ത് എത്തിയെങ്കിലും ആദ്യമണ്ണിടിച്ചില് ആരംഭിച്ചതിന് ശേഷമുള്ള ഗോള്ഡന് അവേഴ്സിലെ അവഗണന അപകടത്തിന് പ്രധാന കാരണമായി എന്നാണ് വിലയിരുത്തുന്നത്. തുരങ്ക നിര്മാണത്തിനായി എടുത്തിട്ട മണ്ണാണ് അപകടത്തിന്റെ ആക്കം കൂട്ടാന് കാരണം. ഈ മണ്ണ് മാറ്റിയിടാന് സ്ഥലം കണ്ടെത്തി നല്കിയില്ല എന്ന് കമ്പനി അധികൃതര് വാദിക്കുന്നു.
ജില്ലയില് പ്രവര്ത്തന രഹിതമായ കരിങ്കല് ക്വാറി കുഴികളില് ഇവ നിക്ഷേപിക്കാം എന്ന നിര്ദേശം മുമ്പ് ജില്ലാ ദുരന്ത നിവാരണ അതോറിറ്റിക്ക് മുന്നില് വന്നിരുന്നു. എന്നാല് ഇതില് തീരുമാനം എടുക്കാനും വിദഗ്ധാഭിപ്രായം തേടാനും വരുത്തിയ കാലതാമസവും വീഴ്ച്ചയാണ്. ഇതിന് പുറമേ തുരങ്കപാത പദ്ധതി പ്രദേശം പരിസ്ഥിതിലോല മേഖലയില്പ്പെടുന്നില്ല എന്ന് കാണിച്ച് പിഡബ്ലുഡി നല്കിയ റിപ്പോര്ട്ടിന് സംസ്ഥാനതല എക്സ്പേര്ട്ട് അപ്രൈസല് കമ്മിറ്റി നല്കിയ അനുമതിയും വിവാദത്തിന് കാരണമാകുന്നുണ്ട്. കസ്തൂരി രംഗന്, ഉമ്മന് വി. ഉമ്മന് സമിതികളുടെ റിപ്പോര്ട്ടുകളിലും തുരങ്കപാത പദ്ധതി ഉള്പ്പെടുന്ന വെള്ളരിമല മുതല് ചെമ്പ്ര കൊടുമുടി വരെ അതീവ പാരിസ്ഥിതിക ദുര്ബല പ്രദേശമായി കണക്കാക്കിയതാണ്. ഈ ഭാഗം സംസ്ഥാന ദുരന്തനിവാരണ അതോറിറ്റിയും ചുവപ്പ് സോണില് ഉള്പ്പെടുത്തിയിട്ടുണ്ട്. എന്നാല് പദ്ധതി പ്രദേശമോ അതിന്റെ ഭാഗങ്ങളോ ഇഎസ്എയില് പെടുന്നില്ല എന്നാണ് പിഡബ്ലുഡി കോഴിക്കോട് എക്സിക്യൂട്ടീവ് എന്ജിനീയര് നല്കിയ അപേക്ഷയിലുള്ളത്.
