ചെന്നൈ: വലിയ അനിശ്ചിതത്വങ്ങള്ക്കൊടുവില് തമിഴ്നാട് മുഖ്യമന്ത്രിയും നടനുമായ വിജയ് നായകനായ അവസാന ചിത്രം ‘ജനനായക’ന്റെ റിലീസ് തിയതി പ്രഖ്യാപിച്ചു. ആരാധകര് കാത്തിരുന്ന ചിത്രം ജൂലായ് 24ന് തിയേറ്ററുകളിലെത്തുമെന്ന് കെ.വി.എന്. പ്രൊഡക്ഷന്സിന്റെ ബിസിനസ് ഹെഡും നിര്മ്മാതാവുമായ സുപ്രീത് മോഹന് സ്ഥിരീകരിച്ചു. ചിത്രത്തിന് സെന്ട്രല് ബോര്ഡ് ഓഫ് ഫിലിം സര്ട്ടിഫിക്കേഷന് ‘ എ’ സര്ട്ടിഫിക്കറ്റാണ് നല്കിയത്. മലയാളി നടി മമിത ബൈജു അഭിനയിക്കുന്നുവെന്നതും ചിത്രത്തിന്റെ പ്രത്യേകതയാണ്.
ജനുവരി 9ന് പൊങ്കല് റിലീസായി പ്രഖ്യാപിച്ച ചിത്രം സെന്സറിംഗിനായി സമര്പ്പിച്ചപ്പോള് ചില രംഗങ്ങളില് മാറ്റം വേണമെന്ന് നിര്ദേശിച്ചിരുന്നു. മാറ്റങ്ങള് വരുത്തി ചിത്രം വീണ്ടും സമര്പ്പിച്ചെങ്കിലും സര്ട്ടിഫിക്കറ്റ് ലഭിച്ചില്ല. ഇതിനെതിരെ നിര്മ്മാതാക്കള് ഹൈക്കോടതിയെ സമീപിച്ചു. ഇതിനിടെ ചിത്രത്തിന്റെ പതിപ്പ് ഓണ്ലൈനില് ചോര്ന്നു. ഇതുമായി ബന്ധപ്പെട്ട് ഒരു ഫിലിം എഡിറ്റര് ഉള്പ്പെടെ നിരവധി പേര് അറസ്റ്റിലായിരുന്നു.
