വയനാട് : കള്ളാടിയിലെ മണ്ണിടിച്ചില് ദുരന്തത്തിന്റെ എല്ലാ ഉത്തരവാദിത്വവും കൊങ്കണ് റെയില്വേയ്ക്ക് ആണെന്ന് പൊതുമരാമത്ത് മന്ത്രി പി കെ ബഷീര്.സ്ഥലത്ത് മണ്ണ് കുട്ടിയിട്ടു. കൃത്യമായി കൊങ്കണ് റെയില്വേയെ ഇക്കാര്യങ്ങള് അറിയിച്ചിരുന്നു. സൈറ്റ് സന്ദര്ശിച്ച സംഘം അപകടകരമായ അവസ്ഥയിലാണ് മണ്ണ് കൂട്ടിയിട്ടിരിക്കുന്നതെന്ന് റിപ്പോര്ട്ട് തന്നു. കൃത്യമായി നടപടികള് സ്വീകരിക്കണമെന്ന് അറിയിപ്പ് നല്കിയെങ്കിലും കൊങ്കണ് റെയില്വേ അധികൃതര് പറഞ്ഞത് യാതൊരു പ്രശ്നവുമില്ല എന്നാണെന്ന് മന്ത്രി പറഞ്ഞു.
കരാര് കമ്പനി അവിടെ കൂട്ടിയിട്ടിരുന്ന മണ്ണ് ആവശ്യമുണ്ടെന്ന് പറഞ്ഞു. മണ്ണൊരിടത്തേക്ക് ഒലിച്ചു പോകില്ല എന്നാണ് കരാര് കമ്പനി പറഞ്ഞത്. നല്ല സുരക്ഷയുണ്ടെന്നും പറഞ്ഞു. ഇനി അവിടുത്തെ തുടര് പ്രവര്ത്തനങ്ങള് മുഖ്യമന്ത്രിയുടെ സാന്നിധ്യത്തില് എല്ലാ വകുപ്പുകളും കൂടിയാലോചിച്ച ശേഷം മാത്രമായിരിക്കുമെന്ന് പി കെ ബഷീര് അറിയിച്ചു.
അതേസമയം, വയനാട് കള്ളാടി മണ്ണിടിച്ചില് ദുരന്തത്തില് മരണം അഞ്ചായി. അതിഥി തൊഴിലാളികളാണ് മരിച്ചത്. കാണാതായ ഏഴുപേര്ക്കായി തിരച്ചില് തുടരുന്നു.പരിക്കേറ്റ ഏഴുപേര് മേപ്പാടി വിംസ് ആശുപത്രിയില് ചികിത്സയിലാണ്. അതില് 19 കാരനായ മധ്യപ്രദേശ് സ്വദേശി ദിലീപിന്റെ ശസ്ത്രക്രിയ ഇന്ന് തന്നെ നടക്കും. ദുരന്ത നിവാരണ സേനയുടെ നേതൃത്വത്തില് രക്ഷാപ്രവര്ത്തനം സ്ഥലത്ത് നടക്കുകയാണ്. മണ്ണിനടിയില് കൂടുതല്പേര് കുടുങ്ങി കിടക്കുന്നുണ്ടോ എന്നറിയാന് കഡാവര് നായകളെ ഉപയോഗിച്ച് പരിശോധന തുടരുകയാണ്.
