പത്തനംതിട്ട:കോന്നിയിലെ 13 വയസുകാരി പീഡിപ്പിക്കപ്പെട്ടെന്ന വ്യാജ പരാതിയില് കസ്റ്റഡിയിലെടുത്ത യുവാവിനെ പൊലീസ് ക്രൂരമായി മര്ദ്ദിച്ചെന്ന് പരാതി. കാലില് ബൂട്ടിട്ട് ചവിട്ടുകയും മുടിയില് പിടിച്ചു വലിക്കുകയും ചെയ്തു.
ചെവിയില് പിടിച്ച് കറക്കി.ബൈപ്പാസ് ശസ്ത്രക്രിയ കഴിഞ്ഞ ആളാണെന്ന് പറഞ്ഞിട്ടും മര്ദ്ദിച്ചു.മൂന്നാം തീയതി വൈകിട്ട് പിടികൂടിയ യുവാവിനെ ഇന്നലെ വൈകിട്ടാണ് വിട്ടയച്ചത്. ഈ സമയം പ്രായപൂര്ത്തിയാകാത്ത കുട്ടികളും സ്റ്റേഷനില് ഉണ്ടായിരുന്നു. ആളുമാറി സഹോദരനെയും പിടിച്ചുകൊണ്ടുപോയെന്നും പിന്നീട് വിട്ടയച്ചുവെന്നും യുവാവ് പറഞ്ഞു.
പെണ്കുട്ടിയെ പീഡിപ്പിച്ചെന്ന പരാതി വന്നയുടന് പിടികൂടിയ യുവാവിനാണ് മര്ദ്ദനമേറ്റത്.സഹപാഠികള് ഉള്പ്പെടെയുള്ളവര് ചേര്ന്ന് പീഡിപ്പിച്ചെന്ന പതിമൂന്നുകാരിയുടെ പരാതി വ്യാജമാണെന്ന് പൊലീസ് പിന്നീട് കണ്ടെത്തിയിരുന്നു.
പെണ്കുട്ടി പീഡനത്തിന് വിധേയായിട്ടില്ലെന്ന വൈദ്യപരിശോധനാ ഫലം പുറത്തുവന്നതോടെയാണ് സംഭവത്തിന്റെ ചുരുളഴിഞ്ഞത്.ഇതേത്തുടര്ന്ന് കേസില് കസ്റ്റഡിയിലെടുത്തിരുന്ന ആറുപേരെയും പൊലീസ് താത്കാലികമായി വിട്ടയച്ചു. പ്രണയനൈരാശ്യമാണ് വ്യാജ പീഡന പരാതിക്ക് പെണ്കുട്ടിയെ പ്രേരിപ്പിച്ചതെന്നാണ് സൂചന.
