മിയാമി: കേപ് വെര്ദെയ്ക്കെതിരായ വിജയത്തിന് ശേഷം, ടീമിന്റെ പോരായ്മകള് തുറന്നുപറഞ്ഞ് അര്ജന്റീന ക്യാപ്റ്റന് ലയണല് മെസി. ‘സത്യസന്ധമായി പറഞ്ഞാല്, ഈ മത്സരം കഠിനമായിരിക്കുമെന്ന് ഞങ്ങള്ക്ക് മുന്കൂട്ടി അറിയാമായിരുന്നു. ഈ ടീം (കേപ് വെര്ദെ) സ്പെയിനിനോടും ഉറുഗ്വെയോടും തോറ്റിട്ടില്ല എന്നത് യാദൃശ്ചികമല്ല,’ ആദ്യ ഗോള് നേടുക എന്ന ഏറ്റവും ബുദ്ധിമുട്ടുള്ള കാര്യം ഞങ്ങള് സാധിച്ചെടുത്തു. അതോടെ കളി കൂടുതല് ശാന്തമായി നിയന്ത്രിക്കാന് കഴിയുമെന്നാണ് ഞങ്ങള് കരുതിയത്, എന്നാല് നേരെ വിപരീതമാണ് സംഭവിച്ചത്. ഗോള് നേടിയ ശേഷം അര്ജന്റീനയ്ക്ക് കളിയുടെ നിയന്ത്രണം നഷ്ടപ്പെട്ടു. പന്ത് കൈവശം വെയ്ക്കുന്നതില് ടീം വരുത്തിയ അശ്രദ്ധയും, പ്രതിരോധത്തിലേക്ക് അമിതമായി ഉള്വലിഞ്ഞതും, സ്കലോണിയുടെ ശൈലിക്ക് വിപരീതമായി കൃത്യമായ പ്രെസ്സിങ് നടത്താന് കഴിയാതെ പോയതുമാണ് കേപ് വെര്ദെയുടെ സമനില ഗോളിന് കാരണമായത്.
നോക്കൗട്ട് മത്സരങ്ങളില് ഒരു ടീമും വിജയം സൗജന്യമായി നല്കില്ല. ഇത് നോക്കൗട്ട് ഘട്ടമാണ്, ഇവിടെ ആരും ഒന്നും വെറുതെ തരില്ല. പേര് നോക്കി ചിലര് മറ്റ് ടീമുകളെ കുറച്ചുകാണിച്ചേക്കാം, എന്നാല് ഇത് എളുപ്പമുള്ള മത്സരമായിരിക്കില്ലെന്ന് ഞങ്ങള്ക്ക് ഉറപ്പായിരുന്നു. ഈ ലോകകപ്പിനെ സവിശേഷമാക്കുന്നത് ഇതാണ്; ഇവിടെ എല്ലാ മത്സരങ്ങളും കടുത്ത പോരാട്ടങ്ങളാണ്.- ലയണല് മെസി പറഞ്ഞു. മികച്ച കളി പുറത്തെടുക്കാന് സാധിക്കാത്തപ്പോഴും പോരാടി വിജയം നേടാന് ടീമിന് കഴിഞ്ഞുവെന്ന് അദ്ദേഹം പറഞ്ഞു. ഇനി ഏറ്റവും പ്രധാനം വിശ്രമിക്കുക എന്നതും അടുത്ത ത്സരത്തെക്കുറിച്ച് ചിന്തിക്കുക എന്നതുമാണ്. ഈ മത്സരത്തില് നിന്നുള്ള പോസിറ്റീവ് ആയ കാര്യങ്ങള് ഉള്ക്കൊണ്ട് മുന്നോട്ട് പോകാന് ശ്രമിക്കും- മെസി കൂട്ടിച്ചേര്ത്തു.
