1991ല് ക്രൊയേഷ്യ യുഗോസ്ലാവ്യയില് നിന്ന് സ്വാതന്ത്ര്യം നേടുമ്പോള് മോഡ്രിച്ചിന്റെ പ്രായം ആറ് വയസ്സായിരുന്നു. 1998 ലോകകപ്പില് ക്രൊയേഷ്യ മൂന്നാം സ്ഥാനത്തെത്തുമ്പോള് മോഡ്രിച്ച് കുട്ടിയായിരുന്നു. പിന്നീട് 2003ല് താരം ക്രൊയേഷ്യന് ക്ലബ്ബ് ഡൈനാമോ സാഗ്രേബ് എന്ന ടീമിനായി കളിച്ചുകോണ്ട് കാല്പന്ത് പോരാട്ടം തുടങ്ങി. 2008 വരെ അവിടെ തുടര്ന്നു. ഇതിനിടെ 2006ല് ക്രൊയേഷ്യന് ദേശീയ ടീമില് അരങ്ങേറി. ഡൈനാമോ സാഗ്രേബിനായി മിഡ്ഫീല്ഡില് കാഴ്ച്ചവച്ച പ്രകടന മികവ് കണ്ട പ്രീമിയര് ലീഗ് ടീം ടോട്ടനം ഹോട്സ്പര് 2008-2009 സീസണില് ടീമിലെടുത്തു.
2010ല് ടോട്ടനം അര നൂറ്റാണ്ടിന്റെ ഇടവേളയ്ക്ക് ശേഷം യുവേഫ ചാമ്പ്യന്സ് ലീഗിന് യോഗ്യത നേടിയപ്പോള് അതില് നിര്ണായക റോള് മോഡ്രിച്ചിനുമുണ്ടായിരുന്നു. അതാണ് താരത്തിന്റെ കരിയര് അടയാളപ്പെടുത്തുന്നത്. പിന്നീട് 2012ല് സ്പാനിഷ് ക്ലബ്ബ് റയല്മാഡ്രിഡ് 30 ദശലക്ഷം പൗണ്ടിന് ലൂക്കായെ സ്വന്തമാക്കി. മാഞ്ചസ്റ്റര് യുണൈറ്റഡില് തുടങ്ങി റയലിലൂടെ ലോകത്തെ കൈയിലെടുത്ത ക്രിസ്റ്റ്യാനോ റൊണാള്ഡോയുടെ തിളക്കത്തിന് പിന്നില് കളി നെയ്തെടുത്ത മോഡ്രിച്ചിന്റെ ചരിത്രം 2012-13 സീസണ് മുതല് റയലില് തുടങ്ങി. 2013-14 സീസണില് റയല് ചാമ്പ്യന്സ് ലീഗ് നേടുമ്പോള് മോഡ്രിച്ച് എന്തായിരുന്നുവെന്ന് പറയേണ്ടതില്ല. മാത്രമല്ല 2016 മുതല് 2018 വരെ സിനീദന് സിദാന് കീഴില് റയല് ഹാട്രിക് ചാമ്പ്യന്സ് ലീഗ് കിരീടം നേടുമ്പോഴും മോഡ്രിച്ച് റയലിനായി മൈതാന മധ്യത്ത് ജീവനാഡിയായി വിളങ്ങിയ പ്രധാനിയായിരുന്നു. ഇതെല്ലാം ലോകത്തിന് മുന്നില് അറിയിക്കാനായി ഒരു സമയവും സ്ഥലവും അവസരവും വേണമായിരുന്നു. അതൊരുങ്ങിയത്. 2018ല് റഷ്യ ലോകകപ്പിലായിരുന്നു. അവിടെ ഫൈനലില് ഫ്രാന്സിനോട് കിടപിടിക്കുന്ന പോരാട്ടവുമായി പൊരുതി തോറ്റു. പക്ഷെ ലോകകപ്പിന്റെ താരമായി തെരഞ്ഞെടുക്കപ്പെട്ടത് മോഡ്രിച്ച് ആയിരുന്നു. പിന്നീടിങ്ങോട്ട് അന്താരാഷ്ട്ര ഫുട്ബോളില് വമ്പന് പേരുകള്ക്കൊപ്പം ക്രൊയേഷ്യയെ കുറിച്ചും ചര്ച്ച ചെയ്യാന് തുടങ്ങി. റയലിന്റെ ഹാട്രിക് കിരീടത്തിലും ക്രൊയേഷ്യയുടെ ലോകകപ്പ് റണ്ണറപ്പ് നേട്ടത്തിനൊപ്പം ലോകകപ്പിന്റെ മികച്ച താരവുമായി മാറിയ ലൂക്കാ അക്കൊല്ലത്തെ ബാലണ് ദി ഓര് പുരസ്കാര ജേതാവായി.
കഴിഞ്ഞ ലോകപ്പില് ക്രൊയേഷ്യയെ മൂന്നാം സ്ഥാനക്കാരാക്കിയാണ് മോഡ്രിച്ച് ഉദ്യമം പൂര്ത്തിയാക്കിയത്. കഴിഞ്ഞ തവണത്തെ യുവേഫ നേഷന്സ് ലീഗിലും മോഡ്രിച്ച് മികവ് അറിയിച്ചു. 202-25 സീസണോടുകൂടി റയല് കൂപ്പായം കൂടി അഴിച്ചുവച്ച മോഡ്രിച്ചിനോട് ഫുട്ബോള് ജീവിതം അവസാനിപ്പിക്കുമ്പോള് ടീമിന്റെ ഉപദേശക സംഘത്തിലും മറ്റുമായി പ്രവര്ത്തിക്കണം എന്ന് ഉടമ്പടി ഉണ്ടാക്കി കഴിഞ്ഞു. കളത്തിലിറങ്ങാത്ത മോഡ്രിച്ചിനെ തേടി റയല് ഇങ്ങോട്ട് വന്ന് ഏല്പ്പിച്ചിരിക്കുകയാണ് ഈ പുതിയ ദൗത്യം.
ജന്മഭൂമി ഓണ്ലൈന്