തിരുവനന്തപുരം: എഫ്സിആര്എ നിയമ ഭേദഗതിക്കെതിരെ മുഖ്യമന്ത്രി അവതരിപ്പിച്ച പ്രമേയം രാഷ്ട്രീയ ലക്ഷ്യം മാത്രം മുന്നിര്ത്തിയുള്ളതാണെന്ന് ബിജെപി എംഎല്എമാരായ വി. മുരളീധരനും ബി.ബി. ഗോപകുമാറും വാര്ത്താസമ്മേളനത്തില് പറഞ്ഞു.
വസ്തുതാവിരുദ്ധമായ കാര്യങ്ങള് പറഞ്ഞ് ജനങ്ങളെ തെറ്റിദ്ധരിപ്പിക്കാന് നിയമസഭാ വേദിയെ മുഖ്യമന്ത്രി ദുരുപയോഗം ചെയ്യുകയാണ്. വിദേശഫണ്ട് വിനിയോഗിക്കുമ്പോള് അതില് സുതാര്യത ഉറപ്പാക്കുക മാത്രമാണ് ഭേദഗതിയുടെ ലക്ഷ്യം. രാജ്യവിരുദ്ധപ്രവര്ത്തനങ്ങള്ക്ക് ഈ ഫണ്ട് വിനിയോഗിക്കപ്പെടുന്നില്ല എന്ന് ഉറപ്പാക്കണം. വിദേശഫണ്ട് മതപരിവര്ത്തനത്തിന് ഉപയോഗിക്കുന്നവര്ക്ക് മാത്രമേ ഭേദഗതി പ്രശ്നമാവുന്നുള്ളൂ. പാര്ലമെന്റ് പാസാക്കുന്ന നിയമങ്ങളില് ഭേദഗതി നിര്ദേശിക്കാന് സംസ്ഥാനങ്ങള്ക്ക് അവകാശമില്ലെന്നും വി. മുരളീധരന് പറഞ്ഞു. വിബി ജി റാം ജി പദ്ധതിയുടെ വേതനം കൂട്ടിയ കേന്ദ്രസര്ക്കാരിനെ അഭിനന്ദിക്കുന്നുവെന്ന് ഇരുവരും പറഞ്ഞു. 100 തൊഴില് ദിനങ്ങള് എന്നത് 125 ആക്കി ഉയര്ത്തിയതും തൊഴില് പൂര്ത്തിയായി പതിനഞ്ചാം ദിവസം കൂലി നല്കണമെന്നതും തൊഴിലാളികള്ക്ക് ഗുണം ചെയ്യും. സംസ്ഥാന സര്ക്കാരുകള്ക്ക് കൂടി സാമ്പത്തിക ഉത്തരവാദിത്തം വരുന്നത് പദ്ധതിയുടെ കാര്യക്ഷമത കൂട്ടുമെന്നും അഭിപ്രായപ്പെട്ടു.
