ഷീട്ടില്: ലോകകപ്പ് ഫുട്ബോളില് ആഫ്രിക്കന് പ്രതീക്ഷകളെ മുന്നോട്ട് നയിക്കാനുള്ള കരുത്തുമായി സെനഗല് ടീം ഇന്ന് കളത്തിലിറങ്ങും. ഭാരത സമയം രാത്രി 1.30ന് ഷീട്ടില് സ്റ്റേഡിയത്തില് നടക്കുന്ന മത്സരത്തില് എതിരാളികള് കരുത്തരായ ബെല്ജിയം. സെനഗലിന് ബെല്ജിയം കടമ്പ അത്ര എളുപ്പമല്ല. പ്രതീക്ഷയോടെയെത്തിയ ബെല്ജിയത്തിന് മുന്നേറാന് സെനഗലിനെ മറികടക്കലും അത്ര എളുപ്പമല്ല.
പ്രാഥമിക റൗണ്ടില് രണ്ട് കളികള് തോറ്റപ്പോള് ഒന്നില് മാത്രമാണ് സെനഗല് ജയിച്ചത്. പരാജയപ്പെട്ട രണ്ട് മത്സരങ്ങളിലും എതിരാളികള് അതിശക്തരായിരുന്നു. ആദ്യ മത്സരത്തില് ഫ്രാന്സിനോട് 1-3ന് പരാജയപ്പെട്ടു. രണ്ടാം മത്സരത്തില് നോര്വേ ജയിച്ചെങ്കിലും സെനഗല് വലിയ ആധിപത്യം പുലര്ത്തിയിരുന്നു. 2-3നാണ് പരാജയപ്പെട്ടത്. നിര്ണായകമായ മൂന്നാം മത്സരത്തില് ഇറാഖിനെ 5-0ന് തകര്ത്തുകൊണ്ട് മൂന്ന് പോയിന്റുമായാണ് സെനഗല് നോക്കൗട്ട് ബെര്ത്ത് ഉറപ്പിച്ചത്.
വമ്പന് താരനിര അണിനിരക്കുന്ന ടീം ആണ് ബെല്ജിയം അതിന് ചേര്ന്ന പ്രകടനമല്ല പ്രാഥമിക റൗണ്ടില് കണ്ടത്. ഈജിപ്തിനോടും ഇറാനോടും സമനിലയില് കുരുങ്ങി. മൂന്നാം മത്സരത്തില് ന്യൂസിലന്ഡുമായി 5-1 വിജയത്തോടെ നോക്കൗട്ട് ഉറപ്പിക്കുകയായിരുന്നു. 2018ലെ സുവര്ണ തലമുറ താരങ്ങളില് ചിലര് ഇപ്പോഴും ടീമിലുണ്ട്. പ്രായമേറിയെങ്കിലും പ്രതിഭയ്ക്ക് മങ്ങലേറ്റിട്ടില്ലെന്ന് ഇവര് കളിക്കുന്ന ക്ലബ്ബ് ടീമുകളിലെ പ്രകടനം അടിവരയിടുന്നു. പക്ഷെ ആ മികവ് ലോകകപ്പില് ഇതുവരെ പുറത്തെടുക്കാന് സാധിച്ചിട്ടില്ല. സെനഗലിനെതിരായ പോരാട്ടത്തില് ഒന്നും ചെയ്യാനായില്ലെങ്കില് ഇനി മറ്റൊരു ലോകകപ്പിലേ പ്രതീക്ഷ വച്ച് പുലര്ത്താനുള്ളൂ.
