ന്യൂയോര്ക്ക്: യൂറോപ്യന് ഫുട്ബോളിന്റെ പാരമ്പര്യവും പോരാട്ടവീര്യവും നേര്ക്കുനേര് എത്തുന്ന ക്ലാസിക് രാത്രി ഇതാ. ഒരു വശത്ത് വേഗതയും സാങ്കേതിക മികവും കൊണ്ട് എതിരാളികളെ വിറപ്പിക്കുന്ന ഫ്രാന്സ്. മറുവശത്ത് അച്ചടക്കവും കരുത്തും ഒരിക്കലും തോല്വി സമ്മതിക്കാത്ത പോരാട്ടവീര്യവുമായി സ്വീഡന്. ചരിത്രത്താളുകളില് അനശ്വരമായ നിരവധി പോരാട്ടങ്ങള് സമ്മാനിച്ച ഈ രണ്ട് ശക്തികള് വീണ്ടും നേര്ക്കുനേര്. ലോകകപ്പ് നോക്കൗട്ട് റൗണ്ടില് നാളെ സൂപ്പര് പോരാട്ടം. യുറോപ്പിലെ രണ്ട് കരുത്തരാണ് മെറ്റ് ലൈഫ് സ്റ്റേഡിയത്തില് കൊമ്പുകോര്ക്കാനിറങ്ങുന്നത്. മുന്ചാമ്പ്യന്മാരും നിലവിലെ റണ്ണേഴ്സുമായ ഫ്രാന്സും കരുത്തരായ സ്വീഡനും തമ്മിലാണ് ഈ ക്ലാസിക്ക് പോരാട്ടം. നാളെ പുലര്ച്ചെ 2.30നാണ് കിക്കോഫ്. ലോകകപ്പ് വേദിയില് ഇന്ന് ജയത്തിനപ്പുറം അഭിമാനത്തിന്റെയും പാരമ്പര്യത്തിന്റെയും പോരാട്ടം. ഫ്രഞ്ച് വഴിയില് സ്വീഡിഷ് പട ബ്ലോക്കുയര്ത്തുമോ?
ഗ്രൂപ്പ് ഐയില് നിന്ന് മൂന്ന് മത്സരങ്ങളും വിജയിച്ചാണ് ഫ്രാന്സ് നോക്കൗട്ട് 32-ല് എത്തിയത്. ഗ്രൂപ്പിലെ ആദ്യകളിയില് സെനഗലിനെ 3-1നും രണ്ടാം കളിയില് ഇറാഖിനെ 3-0നും അവസാന കളിയില് നോര്വേയെ 4-1നും പരാജയപ്പെടുത്തി 9 പോയിന്റുമായാണ് ഫ്രാന്സ് ഗ്രൂപ്പ് ചാമ്പ്യന്മാരായി ഫ്രാന്സ് നോക്കൗട്ട് റൗണ്ടിലെത്തിയത്.
എംബാപ്പെയും ഡെംബലെയും
ഗ്രൂപ്പ് ഘട്ടത്തില് ഫ്രാന്സ് നേടിയ 10 ഗോളില് എട്ടെണ്ണവും അടിച്ചത് സൂപ്പര് സ്ട്രൈക്കറും നായകനുമായ കിലിയന് എംബാപ്പെയും മറ്റൊരു സൂപ്പര്താരമായ ഡെംബലെയും ചേര്ന്നാണ്. രണ്ടുപേരും നാല് ഗോളുകള് വീതമാണ് നേടിയത്. നോര്വേക്കെതിരായ കളിയില് ഡെംബലെ ഹാട്രിക്കും നേടി. ഇവര്ക്ക് പുറമെ ഡിസയര് ഡൗ, മൈക്കല് ഒലിസും മികച്ച താരങ്ങളാണ്. 4-2-3-1 ശൈലിയില് എംബാപ്പെയെ സ്ട്രൈക്കറായാണ് ഫ്രാന്സ് ഇന്നും ഇറങ്ങുക.
മികച്ച മധ്യനിരയും ഫ്രാന്സിന് സ്വന്തം. ഡിഫന്സീവ് മിഡ്ഫീല്ഡര്മാരായി ഔറേലിയന് ചൗമെനിയും കോനെയും ഇറങ്ങുമ്പോള് ഡെംബലെ വലതുവിങ്ങിലും ഡിസയര് ഡൗ ഇടതുവിങ്ങില് ഇറങ്ങും. സെന്ട്രല് മിഡ്ഫീല്ഡറായി ഒലിസെ എത്തും. ഇവരുടെ വേഗവും ഡ്രിബ്ലിങ് മികവും ഫ്രാന്സിനെ ഏറെ അപകടകാരികളാക്കും.
മികച്ച പ്രതിരോധവും അവര്ക്കുണ്ട്. പ്രതിരോധത്തില് നോര്വേക്കെതിരെ പുറത്തിരുന്ന വില്യം സാലിബ ഇന്ന് ആദ്യ ഇലവനില് എത്തും. ദയോത് ഉപമേകാനോ, തിയോ ഹെര്ണാണ്ടസ് തുടങ്ങിയവരും ആദ്യ ഇലവനില് ഉണ്ടാകുമെന്ന് ഉറപ്പാണ്. ഗോള് വലയ്ക്ക് മുന്നില് മൈക്ക് മൈഗ്നാനും ഉറപ്പാണ്.
