കൊച്ചി: നടി ഹണി റോസിനെതിരെയുളള അധിക്ഷേപ പരാമര്ശങ്ങളില് ഖേദം പ്രകടിപ്പിച്ച് വ്യവസായി ബോബി ചെമ്മണ്ണൂര്. തന്റെ വാക്കുകള് നടിക്കും കുടുംബത്തിനും ഉണ്ടാക്കിയ മാനസിക പ്രയാസങ്ങള്ക്ക് പൂര്ണ ഉത്തരവാദിത്തം ഏറ്റെടുക്കുന്നു. ആത്മാര്ത്ഥമായ ക്ഷമാപണം സ്വീകരിച്ച് തനിക്കെതിരെയുള്ള നിയമനടപടികള് പിന്വലിക്കണമെന്നും അദ്ദേഹം ഇന്സ്റ്റാഗ്രാം കുറിപ്പിലൂടെ ആവശ്യപ്പെട്ടു.
ഹണി റോസ് നല്കിയ അപകീര്ത്തി കേസില് ബോബി ചെമ്മണ്ണൂരിനെ മുന്പ് പൊലീസ് അറസ്റ്റ് ചെയ്തിരുന്നു. ദ്രോഹം ചെയ്തതിന് ആത്മാര്ത്ഥമായി ക്ഷമ ചോദിക്കുന്നു. ആരെയും വേദനിപ്പിക്കാന് മനഃപൂര്വം ഉദ്ദേശിച്ചിരുന്നില്ല. പറഞ്ഞ വാക്കുകളുടെയും അതുണ്ടാക്കിയ ആഘാതത്തിന്റെയും പൂര്ണ ഉത്തരവാദിത്തം ഏറ്റെടുക്കുന്നു. ഈ ക്ഷമാപണം സ്വീകരിച്ച് കേസ് പിന്വലിക്കുമെന്ന് പ്രതീക്ഷിക്കുന്നു- ബോബി ചെമ്മണ്ണൂര് കുറിച്ചു.
ഉദ്ഘാടന വേദികളിലും അഭിമുഖങ്ങളിലും തനിക്കെതിരെ നിരന്തരം അധിക്ഷേപകരമായ പ്രസ്താവനകള് നടത്തിയെന്ന് കാട്ടിയാണ് ഹണി റോസ് നിയമനടപടിയുമായി മുന്നോട്ട് പോയത്. ബോബി ചെമ്മണ്ണൂരിന്റെ ക്ഷമാപണത്തോട് നടി ഹണി റോസ് ഇതുവരെ പ്രതികരിച്ചിട്ടില്ല.
