ന്യൂദല്ഹി:പ്രതിപക്ഷനേതാവ് പിണറായി വിജയന്റെ വിമാന യാത്ര മുടങ്ങിയ സംഭവത്തില് പ്രോട്ടോക്കോള് വിഭാഗത്തിന് വീഴ്ച ഉണ്ടായെന്ന് കണ്ടെത്തല്.കഴിഞ്ഞ ദിവസം ദല്ഹിയില് നിന്ന് കോഴിക്കോട്ടേക്ക് യാത്ര മുടങ്ങിയതില് ഉദ്യോഗസ്ഥര്ക്കെതിരെ നടപടിയുണ്ടാകുമെന്നും സൂചനയുണ്ട്.
സി പി എം പി ബി യോഗത്തില് പങ്കെടുത്ത ശേഷം മടങ്ങുകയായിരുന്ന പിണറായി, വിമാനത്താവളത്തില് നേരത്തെ എത്തിയിട്ടും യാത്ര മുടങ്ങുകയായിരുന്നു. കേരള ഹൗസില് ചേര്ന്ന യോഗത്തില് പ്രോട്ടോക്കോള് വിഭാഗത്തിനെതിരെ ശക്തമായ വിമര്ശനമാണ് ഉണ്ടായത്.
വിഐപി പരിഗണന പ്രകാരം വിമാനത്താവളത്തിനുള്ളില് ലഭ്യമാകേണ്ട ബഗ്ഗി ഉള്പ്പെടെയുള്ള സൗകര്യങ്ങള് കൃത്യസമയത്ത് ഉറപ്പാക്കുന്നതില് പ്രോട്ടോക്കോള് ഉദ്യോഗസ്ഥര് പരാജയപ്പെട്ടു. വിമാനക്കമ്പനി അധികൃതരുമായി കൃത്യമായ ആശയവിനിമയം നടത്തുന്നതിലും ഉദ്യോഗസ്ഥര്ക്ക് ഗുരുതര വീഴ്ച സംഭവിച്ചെന്നാണ് വിലയിരുത്തല്.
സംഭവത്തില് അഡീഷണല് റെസിഡന്റ് കമ്മീഷണര് അശ്വതി ശ്രീനിവാസ് അടിയന്തര അന്വേഷണം ആരംഭിച്ചു. ഉദ്യോഗസ്ഥരില് നിന്നും വിശദീകരണം തേടി.
