ടൊറന്റോ: ഗ്രൂപ്പ് ഐയിലെ അവസാന പോരാട്ടത്തില് ഇറാഖിനെ മറുപടിയില്ലാത്ത അഞ്ച് ഗോളുകള്ക്ക് തകര്ത്ത് സെനഗല് നോക്കൗട്ട് റൗണ്ടില്. സെനലിനായി പാപ്പെ ഗുയെ രണ്ട് ഗോളുകള് നേടി. 59, 71 മിനിറ്റുകളിലായിരുന്നു താരത്തിന്റെ ഗോളുകള്. നാലാം മിനിറ്റില് ഹബീബ് ദിയാറ, 56-ാം മിനിറ്റില് ഇസ്മായില സാര്, 82-ാം മിനിറ്റില് ഇലിമാന് എന്ഡിയായെ എന്നിവരും സെനഗലിനായി ലക്ഷ്യം കണ്ടു. ലോകകപ്പ് ചരിത്രത്തില് ഒരു മത്സരത്തില് 5 ഗോളുകള് നേടുന്ന ആദ്യ ആഫ്രിക്കന് രാജ്യമാണ് സെനഗല്.
13-ാം മിനിറ്റില് ഇറാഖിന്റെ റെബിന് സുലക ചുവപ്പുകാര്ഡ് കണ്ട്പുറത്തുപോയത് മത്സരത്തിലെ വഴിത്തിരിവായി. സാദിയോ മാനെയെ ഫൗള് ചെയ്തതിനാണ് താരത്തിന് ചുവപ്പ് കാര്ഡ് ലഭിച്ചത്. തുടര്ന്ന് പത്തുപേരുമായാണ് അവര് കളിച്ചത്. ഇതും സെനഗലിന് അനുകൂല ഘടകമായി.
കളിയില് സെനഗലിന്റെ ആധിപത്യമായിരുന്നു. 69.2 ശതമാനവും പന്ത് കൈവശംവച്ച അവര് 12 ഓണ് ടാര്ഗറ്റ് ഷോട്ടുകള് അടക്കം കളിയില് ആകെ ഉതിര്ത്തത് 28 എണ്ണം. അതേസമയം ഒരിക്കല് മാത്രമാണ് ഇറാഖിന് ഓണ് ടാര്ഗറ്റ് ഷോട്ട് ഉതിര്ക്കാനായത്. ഈ ഒരെണ്ണമടക്കം ആകെ അവര് പായിച്ചത് 6 ഷോട്ടുകള്.
കളിയുടെ തുടക്കം മുതല് സെനഗല് മുന്നേറ്റമായിരുന്നു. പലതവണ അവര് ഇറാഖ് പ്രതിരോധത്തെ വിറപ്പിച്ചു. നാലാം മിനിറ്റില് തന്നെ സെനഗല് ലീഡ് എടുത്തു. അവര്ക്ക് അനുകൂലമായി ലഭിച്ച കോര്ണര് കിക്ക് അബ്ദുല്ലായെ സെക്ക് തലകൊണ്ട് തിരിച്ചുവിട്ടത് ബോക്സിലുണ്ടായിരുന്ന ഹബീബ് ദിയാറയുടെ ദേഹത്ത് തട്ടി പന്ത് വലയില് കയറി. തുടര്ന്നും നിരവധി തവണ അവര് ഇറാഖ് പ്രതിരോധം തകര്ത്തെങ്കിലും മികച്ച ഫോമിലായിരുന്ന ഇറാഖ് ഗോളിയെ കീഴടക്കി ലീഡ് ഉയര്ത്താനായില്ല.
പിന്നീട് 56-ാം മിനിറ്റിലാണ് സെനഗല് ലീഡ് ഉയര്ത്തുന്നത്. ഇറാഖ് താരം സിദാന് ഇഖ്ബാലിന് സ്വന്തം ബോക്സിന് മുന്നില് വെച്ച് പറ്റിയ പിഴവ് ലാമിന് കമാര മുതലെടുത്തു. കമാര നല്കിയ പാസ് സ്വീകരിച്ച് ഇസ്മായില സാര് ലക്ഷ്യം കണ്ടു. മൂന്ന് മിനിറ്റിനുശേഷം അവര് വീണ്ടും ഇറാഖ് വല കുലുക്കി.
പകരക്കാരനായി കളത്തിലിറങ്ങി വെറും 89 സെക്കന്ഡുകള്ക്കുള്ളില് പാപെ ഗുയെ തന്റെ ആദ്യ ഗോള് നേടി. ബോക്സിന്റെ വലതുഭാഗത്തുനിന്നും താരം തൊടുത്ത ഇടതുകാല് ഷോട്ട് ഇറാഖ് കീപ്പറെ കീഴടക്കി പോസ്റ്റിന്റെ ടോപ്പ് കോര്ണറിലേക്ക് തുളച്ചുകയറി. 71-ാം മിനിറ്റില് താരം തന്റെ രണ്ടാം ഗോളും നേടി. ഇറാഖ് പ്രതിരോധത്തിന്റെ മറ്റൊരു പിഴവ് മുതലെടുത്താണ് ലക്ഷ്യം കണ്ടത്. ബോക്സിന് തൊട്ടുപുറത്തുനിന്നും താരം ഉതിര്ത്ത മറ്റൊരു ബുള്ളറ്റ് ഷോട്ട് ഇറാഖ് വലയില് തറച്ചുകയറി.
82-ാം മിനിറ്റില് സെനഗല് ഗോള്പട്ടിക പൂര്ത്തിയാക്കി. 20 യാര്ഡ് അകലെ നിന്നു ലഭിച്ച പന്തുമായി മുന്നേറിയ ഇലിമാന് എന്ഡിയായെ പായിച്ച ഉഗ്രന് ലോങ്ഞ്ചേറാണ് ഇറാഖ് വലയില് കയറിയത്. ഇതോടെ ഗ്രൂപ്പിലെ ആദ്യ വിജയം സെനഗലിന് സ്വന്തമായി. ഗ്രൂപ്പില് കളിച്ച മൂന്ന് കളികളും തോറ്റാണ് ഇറാഖ് പുറത്തായത്.
