തിരുവനന്തപുരം: കണ്ണൂര് ജില്ലയിലെ പഴയങ്ങാടിക്കടുത്ത്, മാടായി പഞ്ചായത്തില് സ്ഥിതിചെയ്യുന്ന മാടായിപ്പാറ, ജൈവവൈവിധ്യത്തിന്റെയും ചരിത്രപരവും സാംസ്കാരികവുമായ ഈടുവെപ്പുകളുടെയും ഭൂമികയാണ്. തുടര്ച്ചയായ കൈയേറ്റങ്ങള് കാരണം 600 ഹെക്ടറില് നിന്ന് 120 ഹെക്ടറില് താഴെയായി ചുരുങ്ങിപ്പോയ ഈ ചെങ്കല് പീഠഭൂമിയുടെ സംരക്ഷണത്തിന് അധികൃതരുടെ അടിയന്തര ഇടപെടല് ആവശ്യമാണ്. 45ഓളം അപൂര്വവും വംശനാശഭീഷണി നേരിടുന്നതുമായ സസ്യ ഇനങ്ങളുള്പ്പെടെ 512ല് അധികം സസ്യ ഇനങ്ങളും 150ല് അധികം ചിത്രശലഭ ഇനങ്ങളും ഉള്ക്കൊള്ളുന്ന ജൈവ കലവറയാണ് ഈ പീഠഭൂമി. അസുലഭമായ ആവാസ വ്യവസ്ഥയും പാരിസ്ഥിതിക സവിശേഷതകളും മാത്രമല്ല, ഈ പ്രദേശത്തിന്റെ ആത്മീയവും സാംസ്കാരികവുമായ പ്രാധാന്യവും കണക്കിലെടുക്കേണ്ടതുണ്ട്.
ചേര രാജവംശത്തിന്റെ സൈനിക-ഭരണ കേന്ദ്രമെന്നതിന് തെളിവായി മാടായി കോട്ടയുടെ അവശിഷ്ടങ്ങള് ഇവിടെ കാണാം. തൊട്ടടുത്ത പാളയം മൈതാനം സൈന്യത്തിലെ കുതിരപ്പടയാളികളുടെ പരിശീലനകേന്ദ്രമായിരുന്നുവെന്നാണ് ചരിത്രകാരന്മാരുടെ നിഗമനം. ആഗോള സമുദ്രവ്യാപാരത്തില് കേരളത്തിന്റെ ചരിത്രപരമായ പങ്കിനെ സൂചിപ്പിക്കുന്ന പുരാതന ജൂത ആവാസ സ്ഥലങ്ങളുടെ അപൂര്വ പുരാവസ്തു അവശിഷ്ടമായി ജൂതക്കുളം സ്ഥിതിചെയ്യുന്നു. ടിപ്പു സുല്ത്താന്റെ ആക്രമണങ്ങള്ക്കെതിരെ ഇവിടുത്തെ ജനങ്ങള് നടത്തിയ പ്രതിരോധവും മാടായിപ്പാറയുടെ ചരിത്രത്തിന്റെ ഭാഗമാണ്. ടിപ്പുവിന്റെ ആക്രമണം മാടായി കോട്ടയ്ക്കും പുരാതനമായ വടുകുന്ദ ശിവക്ഷേത്രത്തിനും വലിയ നാശനഷ്ടങ്ങള് വരുത്തിയിരുന്നു. മെഗാലിത്തിക് ഘടനകള് വെളിപ്പെടുത്തപ്പെട്ട എഎസ്ഐയുടെ പ്രാഥമിക സര്വേകള്, പ്രാചീനകാല മനുഷ്യവാസത്തിന്റെയും സംസ്കാരത്തിന്റെയും കളിത്തൊട്ടിലായ ഈ സ്ഥലത്തെക്കുറിച്ച് സമഗ്രപഠനത്തിന്റെ ആവശ്യം ചൂണ്ടിക്കാട്ടുന്നു.
കോലത്തിരി രാജവംശവുമായും ചിറക്കല് കോവിലകവുമായും ചരിത്രപരമായി ബന്ധപ്പെട്ടിരിക്കുന്ന, ശാക്തേയ ആരാധനയുടെ പ്രധാന കേന്ദ്രമാണ് തിരുവര്കാട് ഭഗവതിക്കാവ് (മാടായിക്കാവ്). മലബാര് ദേവസ്വം ബോര്ഡിന് കീഴിലുള്ള ഈ ഭഗവതിക്ഷേത്രം ഈ പ്രദേശത്തെ ജനജീവിതത്തിന്റെ ആത്മാവാണ്. കൂടുതല് കൈയേറ്റങ്ങളും പാരിസ്ഥിതിക തകര്ച്ചയും വിലപ്പെട്ട ഈ ശേഷിപ്പുകളുടെ നാശത്തിന് ഇടയാകാതിരിക്കണമെങ്കില് മാടായിപ്പാറയെ ജൈവ വൈവിധ്യ ചരിത്ര പൈതൃകമേഖലയായി പ്രഖ്യാപിക്കണമെന്നും കാവുകളുടെയും അനുബന്ധ ജലാശയങ്ങളുടെയും സംരക്ഷണത്തിനായി പ്രത്യേക പരിസ്ഥിതി സംരക്ഷണപദ്ധതി ആരംഭിക്കണമെന്നും ഭാരതീയ വിചാരകേന്ദ്രം കേന്ദ്ര സാംസ്കാരിക മന്ത്രാലയത്തോടും എ.എസ്.ഐയോടും ആവശ്യപ്പെടുന്നു. ദുര്ബലമായ ലാറ്ററൈറ്റ് മേല്മണ്ണും കാലികമായി പ്രത്യക്ഷപ്പെടുന്ന സസ്യ-ജന്തുജാലങ്ങളും സംരക്ഷിക്കുന്നതിന് ഈ സ്ഥലത്ത് അമിതമായ അനധികൃത വാഹനഗതാഗതത്തിനും മാലിന്യ നിക്ഷേപത്തിനും കര്ശന നിയന്ത്രണം ഏര്പ്പെടുത്തണം.
നമ്മുടെ പാരിസ്ഥിതിക വിവേകത്തിന്റെയും ചരിത്രപരമായ സ്വത്വത്തിന്റെയും ജീവിക്കുന്ന സ്മാരകമായ ഈ പ്രദേശത്തെ, ഏന്ഷ്യന്റ് മോണ്യുമെന്റ്സ് ആന്ഡ് ആര്ക്കിയോളജിക്കല് സൈറ്റ്സ് ആന്ഡ് റിമെയ്ന്സ് ആക്ട് 1958 (എഎംഎസ്ആര് ആക്ട്) ഉപയോഗിച്ചു സംരക്ഷിക്കണം.
മലബാര് ദേവസ്വം ബോര്ഡിന്റെ കീഴിലുള്ള പവിത്രവും ചരിത്രപ്രാധാന്യവുമുള്ള ഈ പീഠഭൂമി പ്രദേശം സംരക്ഷിക്കാനുള്ള എല്ലാ സംരംഭങ്ങള്ക്കും ബോര്ഡിന്റെ പൂര്ണ പിന്തുണ ഉണ്ടാകണമെന്നും അഭ്യര്ത്ഥിക്കുന്നു. തിരുവനന്തപുരത്ത് ചേര്ന്ന സംസ്ഥാന സമിതിയില് ഡോ. സി.വി. ജയമണി അധ്യക്ഷത വഹിച്ചു. ഡയറക്ടര് ആര്. സഞ്ജയന്, ജനറല് സെക്രട്ടറി ഡോ. എന്. സന്തോഷ്കുമാര്, കെ.സി. സുധീര് ബാബു, ഡോ. സി.എ. ഗീത, ഡോ. കെ.എന്. മധുസൂദനന് പിള്ള, ശ്രീധരന് പുതുമന, ടി. കെ. രാമനാഥന്, അഡ്വ. സി.എന്. പരമേശ്വരന്, ജെ. മഹാദേവന് തുടങ്ങിയവര് പങ്കെടുത്തു.
