അസ്റ്റെക്കയുടെ ഗോള്വലയത്തിനുമുന്നില് രണ്ട് ദശാബ്ദങ്ങള് കാവല് നിന്ന മനുഷ്യന് ഒടുവില് കൈയുറകള് അഴിച്ചുവെക്കുകയാണ്. ബ്രസീലിന്റെ ഷോട്ടുകള്ക്കും ജര്മ്മനിയുടെ ആക്രമണങ്ങള്ക്കും മുന്നില് മതിലായി നിന്ന ‘മെമോ’ ഒച്ചോവ ഇനി ഓര്മ്മകളുടെ ഗോള്പോസ്റ്റില് മാത്രം നില്ക്കും. എന്നാല് ലോകകപ്പ് ചരിത്രത്തിലെ മഹത്തായ സേവുകളില് പലതിന്റെയും പിന്നില് എന്നും അയാളുടെ ചുരുണ്ട മുടിയും നീണ്ട കൈകളും കാണപ്പെടും. അതെ ഗില്ലര്മോ ഒച്ചോവ എന്ന മെക്സിക്കന് ഗോള് കീപ്പര് വിരമിച്ചു.
ചെക്ക് റിപ്പബ്ലിക്കിനെതിരായ മത്സരത്തിലെ അവസാന 13 മിനിറ്റില് ഒച്ചോവയെ ഇറക്കി പരിശീലകന് അദ്ദേഹത്തിന് വിടവാങ്ങലൊരുക്കി. ഈ സമയം അസ്റ്റെക്ക സ്റ്റേഡിയം മുഴുവന് ‘ഓച്ചോവ’ എന്ന് മുഴങ്ങി. സഹതാരങ്ങള് മത്സരശേഷം അദ്ദേഹത്തെ ചുമലിലേറ്റി ആഘോഷിച്ചു.
40-ാം വയസ്സില് അദ്ദേഹം ലോകകപ്പ് വേദിയോട് വിടപറയുന്നത് ഒരു കളിക്കാരന്റെ വിരമിക്കല് മാത്രമല്ല, മെക്സിക്കന് ഫുട്ബോളിലെ ഒരു തലമുറയുടെ അവസാനവും കൂടിയാണ്. ഒച്ചോവ ലോക ഫുട്ബോളില് ഏറ്റവും കൂടുതല് ഓര്മ്മിക്കപ്പെടുന്നത് ലോകകപ്പുകളിലെ അത്ഭുത പ്രകടനങ്ങളാലാണ്. 2014 ലോകകപ്പില് ആതിഥേയരായ ബ്രസീലിനെതിരെ നടത്തിയ സേവുകളുടെ പരമ്പര അദ്ദേഹത്തെ ലോകപ്രശസ്തനാക്കി. 2018 ലോകകപ്പില് ജര്മ്മനിക്കെതിരായ വിജയത്തില് ഒമ്പത് സേവുകള് നടത്തിയതും മറ്റാരുമല്ല. 2022 ലോകകപ്പില് പോളണ്ടിനെതിരെ റോബര്ട്ട് ലെവന്ഡോവ്സ്കിയുടെ പെനാല്റ്റി തടഞ്ഞത് ഇന്നും ആരാധകരുടെ മനസിലെ മികച്ച ഓര്മയാണ്. ഈ ലോകകപ്പില് കളിച്ചതോടെ ആറ് ലോകകപ്പില് പങ്കെടുത്ത് മെസിക്കും റൊണാള്ഡോയ്ക്കുമൊപ്പം ചരിത്രം സൃഷ്ടിച്ചു.
ഒച്ചോവയുടെ കരിയറിന് അതുല്യമായ ഒരു വൃത്തപൂര്ണത ഈ മത്സരത്തിലുണ്ടായി. 2004-ല് അദ്ദേഹം തന്റെ സീനിയര് അരങ്ങേറ്റം കുറിച്ച അതേ സ്റ്റേഡിയമായ അസ്റ്റെക്കയിലാണ് ലോകകപ്പ് യാത്രയുടെ അവസാന അധ്യായവും എഴുതിച്ചേര്ത്തിരിക്കുന്നത്. മത്സരശേഷം അദ്ദേഹം വികാരാധീനനായി പറഞ്ഞത് ഇങ്ങനെയായിരുന്നു, ‘എന്റെ ആദ്യ മത്സരം അസ്റ്റെക്കയിലായിരുന്നു. എന്റെ അവസാന മത്സരവും അസ്റ്റെക്കയിലാണ്. എന്റെ കരിയറിന്റെ മനോഹരമായ അവസാന അധ്യായമാണിത്. എല്ലാവര്ക്കും നന്ദി.
