തൃപ്പൂണിത്തുറ: അസുഖബാധിതയായ അമ്മയെ പരിചരിക്കാനായി അമേരിക്കയിൽ നിന്ന് നാട്ടിലെത്തിയ മകൻ, അമ്മയുടെ മരണവേദന താങ്ങാനാകാതെ മണിക്കൂറുകൾക്കകം വിടപറഞ്ഞത് തൃപ്പൂണിത്തുറയെ കണ്ണീരിലാഴ്ത്തി.തൃപ്പൂണിത്തുറ വടക്കേക്കോട്ടെ പാഴൂർ ലെയിനിലെ ‘ചിത്ര’യിൽ താമസിച്ചിരുന്ന പി.കെ. രുക്മിണി അമ്മ (83) അസുഖബാധിതയായതിനെ തുടർന്നാണ് അമേരിക്കയിൽ സ്ഥിരതാമസക്കാരനായ മകൻ ഹരിമിത്ര (46) നാട്ടിലെത്തിയത്. അമ്മയുടെ അവസാന നാളുകളിൽ ഒപ്പമിരിക്കാനും പരിചരിക്കാനുമായിരുന്നു അദ്ദേഹത്തിന്റെ വരവ്.
എന്നാൽ കഴിഞ്ഞ ശനിയാഴ്ച രുക്മിണി അമ്മ മരണത്തിന് കീഴടങ്ങി. വിദേശത്തുള്ള കൊച്ചുമക്കൾ എത്തേണ്ടതിനാൽ സംസ്കാരം മാറ്റിവെച്ചിരിക്കെ, കുടുംബത്തെ മറ്റൊരു ദുരന്തം കൂടി തേടിയെത്തി. പെട്ടെന്നുണ്ടായ അസ്വസ്ഥതയെ തുടർന്ന് ആശുപത്രിയിൽ പ്രവേശിപ്പിച്ച ഹരിമിത്രയും ബുധനാഴ്ച മരണത്തിന് കീഴടങ്ങി.
അമ്മയെ യാത്രയാക്കാൻ നാട്ടിലെത്തിയ മകൻ, അമ്മയ്ക്കൊപ്പം യാത്രയായതോടെ കുടുംബവും നാട്ടുകാരും ദുഃഖത്തിലായി. ഹൃദയം തകർക്കുന്ന ഈ വേർപാടിൽ, അമ്മയുടെയും മകന്റെയും സംസ്കാരം ഒകഴിഞ്ഞ ദിവസം നടത്തി. ഒരു അമ്മയുടെ അവസാന നാളുകളിൽ താങ്ങായി മാറാൻ എത്തിയ മകൻ, അമ്മയുടെ യാത്രയ്ക്ക് പിന്നാലെ തന്നെ മടങ്ങിയതിന്റെ വേദനയാണ് ബന്ധുക്കളുടെയും സുഹൃത്തുക്കളുടെയും മനസിൽ നിറയുന്നത്.
