കരുനാഗപ്പള്ളി: ഐക്യരാഷ്ട്രസഭയുടെ സുസ്ഥിര വികസന സൂചികകള് മുന്നിര്ത്തി തയാറാക്കിയ ടൈംസ് ഹയര് എഡ്യൂക്കേഷന് സുസ്ഥിരതാ ഇംപാക്ട് റേറ്റിങ് 2026ല് അമൃത സര്വകലാശാലക്ക് മികച്ച നേട്ടം. ഇന്ഡസ്ട്രി, ഇന്നവേഷന് ആന്ഡ് ഇന്ഫ്രാസ്ട്രക്ചര് വിഭാഗത്തില് അമൃത ഇന്ത്യയില് ഒന്നാം സ്ഥാനം സ്വന്തമാക്കി. സുസ്ഥിരമായ അടിസ്ഥാന സൗകര്യ വികസനം, എല്ലാവരെയും ഉള്ക്കൊള്ളുന്ന വ്യവസായവത്കരണം, നൂതന ഗവേഷണങ്ങള് എന്നിവക്കുള്ള സര്വകലാശാലയുടെ സംഭാവനകള് മുന്നിര്ത്തിയാണ് അംഗീകാരം. ഐക്യരാഷ്ട്രസഭയുടെ 17 സുസ്ഥിര വികസന ലക്ഷ്യങ്ങള് നടപ്പിലാക്കുന്നതില് സര്വകലാശാലകളുടെ പങ്കിനെ വിലയിരുത്തുന്ന ലോകത്തിലെ ഏക പ്ലാറ്റ്ഫോമാണ് ടൈംസ് ഹയര് എഡ്യൂക്കേഷന്.
ലോകമെമ്പാടുമുള്ള 115 ലധികം രാജ്യങ്ങളില് നിന്നുള്ള 1,500 ലധികം മുന്നിര ഉന്നത വിദ്യാഭ്യാസ സ്ഥാപനങ്ങളില് നിന്നാണ് അമൃത ആഗോളതലത്തില് 37-ാം റാങ്ക് നിലനിര്ത്തിയത്. ഇന്തോനേഷ്യയിലെ ജക്കാര്ത്തയില് നടന്ന ഗ്ലോബല് സസ്റ്റെയിനബിള് ഡെവലപ്മെന്റ് കോണ്ഗ്രസ് 2026ലാണ് ഫലം പ്രഖ്യാപിച്ചത്. വിവിധ സുസ്ഥിര വികസന ലക്ഷ്യങ്ങളുടെ റാങ്കിങ്ങിലും അമൃത ശ്രദ്ധേയമായ മുന്നേറ്റം കാഴ്ചവച്ചു.
ഗുണനിലവാരമുള്ള വിദ്യാഭ്യാസം, ലിംഗസമത്വം, ദാരിദ്ര്യനിര്മാര്ജനം, ശുദ്ധജലവും ശുചിത്വവും, ശുദ്ധവുമായ ഊര്ജം എന്നീ അഞ്ച് വിഭാഗങ്ങളില് അമൃതലോകത്തിലെ ആദ്യ 25 സര്വകലാശാലകളുടെ പട്ടികയില് ഇടംപിടിച്ചു. കൂടാതെ ഇന്ഡസ്ട്രി, ഇന്നവേഷന് ആന്ഡ് ഇന്ഫ്രാസ്ട്രക്ചര്, കാലാവസ്ഥാ വ്യതിയാനം എന്നീ വിഭാഗങ്ങളില് ആഗോളതലത്തില് ആദ്യ 50ലും ആരോഗ്യവും സുസ്ഥിതിയും വിഭാഗത്തില് ആദ്യ 100 റാങ്കിലും അമൃത ഇടം നേടി. സാമൂഹിക പ്രതിബദ്ധതയില് ഊന്നിയുള്ള സര്വകലാശാലയുടെ പ്രവര്ത്തനങ്ങളുടെ വിജയമാണ് ഈ നേട്ടമെന്ന് അമൃത വിശ്വവിദ്യാപീഠം പ്രോ വൈസ് ചാന്സലറും സ്കൂള് ഫോര് സസ്റ്റെയിനബിള് ഫ്യൂച്ചേഴ്സ് ഡീനുമായ ഡോ. മനീഷ വി. രമേശ് വ്യക്തമാക്കി.
