കോട്ടയം: കേരളത്തിലെ റബര് കര്ഷകരുടെ പ്രശ്നങ്ങള് കേന്ദ്രത്തിന്റെ ശ്രദ്ധയില്പ്പെടുത്തി ശാശ്വതപരിഹാരം ഉണ്ടാക്കുമെന്ന് റബര് ബോര്ഡ് ചെയര്മാന് എന്. ഹരി. കര്ഷകര്ക്ക് റബറിന് വില കിട്ടണം. ഇതിനുവേണ്ട പ്രവര്ത്തനങ്ങള് നടത്തുമെന്നും ചെയര്മാനായി ചുമതലയേറ്റ ശേഷം മാധ്യമപ്രവര്ത്തകരോട് അദ്ദേഹം പറഞ്ഞു. റബര് കര്ഷകരുടെ ആശങ്കകള് പരിഹരിക്കും. മറ്റു കൃഷികളിലേക്ക് പോയവരെ തിരിച്ചുകൊണ്ടുവരാന് പ്രചാരണം നടത്തും. റബര് ഉത്പാദക സംഘങ്ങളുമായി ചര്ച്ച നടത്തും. റബര് കൃഷി കൂടുതല് ജനകീയമാക്കും.
റബര് മേഖലയുടെ സമഗ്ര പുരോഗതിക്കായി എംഎല്എമാരുടെയും എംപിമാരുടെയും ആശയങ്ങളും നിര്ദേശങ്ങളും സ്വീകരിക്കാന് അവരെ കാണും. സംസ്ഥാന സര്ക്കാരിന്റെ പൂര്ണ പിന്തുണ തേടും. ഇതിനായി മുഖ്യമന്ത്രിയുമായി ചര്ച്ച നടത്തും. റബര് ബോര്ഡ് അംഗങ്ങളുടെ എണ്ണം ഒരുമാസത്തിനകം പൂര്ത്തിയാക്കും. റബര് മേഖലയില് പുതിയ സംരംഭങ്ങള് തുടങ്ങാന് യുവാക്കള്ക്ക് പരിശീലനം നല്കും. ബോര്ഡിനെ വ്യവസായ സൗഹൃദമാക്കും. പരിശീലനം നേടുന്ന യുവാക്കള്ക്ക് അസംസ്കൃത വസ്തുക്കള് നല്കും. ഉത്പന്നങ്ങള്ക്ക് വിപണി കണ്ടെത്താന് സഹായിക്കും. ടാപ്പ് ചെയ്യാത്ത തോട്ടങ്ങള് പുനരുദ്ധരിക്കും.
ഇന്നലെ കോട്ടയത്തെ റബര് ബോര്ഡ് ആസ്ഥാനത്ത് പുതിയ ചെയര്മാനായി എന്. ഹരി ചുമതലയേറ്റു. മൂന്നു വര്ഷത്തേക്കാണ് നിയമനം. കോട്ടയം പള്ളിക്കത്തോട് സ്വദേശിയായ ഹരി പരമ്പരാഗത റബര് കര്ഷകനാണ്. റബര് കര്ഷകന് തന്നെ ബോര്ഡിന്റെ സുപ്രധാന പദവിയിലെത്തിയെന്ന പ്രത്യേകതയുമുണ്ട് ഈ സ്ഥാനലബ്ധിക്ക്. 2022 മുതല് റബര് ബോര്ഡ് അംഗമാണ് ഹരി. ബിജെപി ആലപ്പുഴ മേഖല പ്രസിഡന്റും പ്രഭാരിയുമാണ്. കോട്ടയം ജില്ലയുടെ മുന് അധ്യക്ഷനാണ്.
ബോര്ഡ് ചെയര്മാനാകുന്ന ഐഎഎസുകാരനല്ലാത്ത നാലാമത്തെയാളാണ് ഇദ്ദേഹം. 1972-ലാണ് കോണ്ഗ്രസ് നേതാവായ പാലാ സ്വദേശി പ്രൊഫ. കെ.എം. ചാണ്ടിയെ ബോര്ഡ് ചെയര്മാനാക്കിയത്. പിന്നീട് കോന്നി മുന് എംഎല്എ പി.ജെ. തോമസ് ചെയര്മാനായി. 2016ല് കേന്ദ്രസര്ക്കാര് നിയമഭേദഗതിക്കു ശേഷം ബോര്ഡ് ചെയര്മാനായത് കൊല്ക്കൊത്ത സ്വദേശിയും ബിജെപി നേതാവുമായ ഡോ. സവാര് ധനാനിയ ആണ്.
