ഡാളസ്: ലോകകപ്പ് ഫുട്ബോള് 2026 റിക്കാര്ഡ് ഗോള് സ്കോറര്മാരുടെ പോരാട്ട വേദിയായി മാറിയിരിക്കുകയാണ്. ഗ്രൂപ്പ് ഘട്ടത്തിലെ രണ്ട് മത്സരങ്ങള് കഴിയുമ്പോഴാണ് വാശിയേറിയ ഈ വ്യക്തിഗത പോരാട്ടം കൊടുമ്പിരികൊള്ളുന്നത്. ഓസ്ട്രിയക്കെതിരായ ഇരട്ട ഗോളിലൂടെ മെസി, ലോകകപ്പ് ചരിത്രത്തില് ഏറ്റവും കൂടുതല് തവണ സ്കോര് ചെയ്ത റിക്കാര്ഡ് ഭേദിച്ചു.
2014ലെ ബ്രസീല് ലോകകപ്പില് ജര്മനിയുടെ മുന് സ്ട്രൈക്കര് മിറോസ്ലാവ് ക്ലൊസെ 16 ഗോളുകള് നേടി സ്ഥാപിച്ച റിക്കാര്ഡ് ആണ് മെസി മറികടന്നത്. മെസിക്കു തൊട്ടുപിന്നാലെ ഫ്രഞ്ച് സൂപ്പര് താരം കിലിയന് എംബാപ്പെയുണ്ട്. ഇറാഖിനെതിരായ പോരാട്ടത്തിലൂടെ എംബാപ്പെ ക്ലൊസേയ്ക്കൊപ്പമെത്തി. ബ്രസീലിയന് ഇതിഹാസം റൊണാള്ഡോ സ്ഥാപിച്ച 15 ഗോള് റിക്കാര്ഡ് ആണ് 2014ല് ക്ലോസെ മറികടന്നത്.
2006 ലോകകപ്പില് മൂന്ന് ഗോളുകള് നേടിക്കൊണ്ട് റൊണാള്ഡോ മറികടന്നത് ജര്മന് ഇതിഹാസ താരം ഗെര്ഡ് മുള്ളറുടെ റിക്കാര്ഡ് ആയിരുന്നു. 1974ല് പശ്ചിമ ജര്മനി രണ്ടാം ലോക കിരീടം ചൂടുമ്പോള് ടീമിലെ പ്രധാന താരമായിരുന്നു മുള്ളര്. അക്കൊല്ലം ഫൈനലില് മറ്റൊരു ഇതിഹാസ ഫുട്ബോളര് യോഹാന് ക്രൈഫ് ഉള്പ്പെട്ട നെതര്ലന്ഡ്സിനെ കീഴടക്കി പശ്ചിമ ജര്മനി ജേതാക്കളായപ്പോള് ഏറ്റവും കൂടുതല് ഗോളുകള് നേടിക്കൊണ്ട് മുള്ളര് റിക്കാര്ഡ് സ്ഥാപിച്ചു.
മെസി വിടവാങ്ങല് ലോകകപ്പ് ആണ് കളിക്കുന്നതെങ്കില് എംബാപ്പെ 27 വയസിലെത്തിയതേയുള്ളൂ. അടുത്ത ലോകകപ്പില് ഫ്രഞ്ച് ടീമില് എംബാപ്പെ തീര്ച്ചയായും ഉണ്ടാകുമെന്ന് ഉറപ്പിക്കാം. എങ്കിലും ഇക്കുറി മെസി റിക്കാര്ഡ് നേട്ടത്തോടെ വിടവാങ്ങുമോ അതോ എംബാപ്പെ തന്നെ മുന്നിലെത്തുമോയെന്ന വാശിയേറിയ മത്സരം കൂടി വരും ദിവസങ്ങളില് അരങ്ങേറും.
ലോകകപ്പ് ചരിത്രത്തില് കൂടുതല് ഗോള് നേടിയ ആദ്യ
അഞ്ച് താരങ്ങള്
താരം (രാജ്യം) – ഗോള് (മത്സരങ്ങള്)- വര്ഷങ്ങള്
ലയണല് മെസി (അര്ജന്റീന) – 18(28*) 2006, 2010(ഗോളില്ല), 2014, 2018, 2022, 2026
കിലിയന് എംബാപ്പെ (ഫ്രാന്സ്) – 16 (16*) 2018, 2022, 2026*
മിറോസ്ലാവ് ക്ലൊസെ(ജര്മനി) – 16 (24) 2002, 2006, 2010, 2014
റൊണാള്ഡോ (ബ്രസീല്) – 15 (19) 1998, 2002, 2006
ഗെര്ഡ് മുള്ളര് (ജര്മനി) – 14 (13) 1970, 1974
