ലോസ് അഞ്ചലസ്: ഗോളിമാര് തകര്ത്ത് വാഴുന്ന 2026 ലോകകപ്പ് ഫുട്ബോളില് ബെല്ജിയത്തിന് ആശ്വാസമായത് തിബോ കുര്ത്വ. ഗ്രൂപ്പ് ജിയില് ഇന്നലെ നടന്ന പോരാട്ടത്തില് ഇറാന് ബെല്ജിയം വലയിലേക്ക് എണ്ണം പറഞ്ഞ മൂന്ന് ഷോട്ടുകളാണുതിര്ത്തത്. പരിചയ സമ്പത്തും പ്രതിഭയും ഒത്തുചേര്ന്ന ഗോള് കീപ്പര് തിബോയുടെ മികവാണ് അട്ടിമറി ഒഴിവാക്കിയത്. ബെല്ജിയം താരങ്ങള് മറുഭാഗത്തേക്ക് ഒട്ടേറെ മുന്നേറ്റങ്ങള് നടത്തിയെങ്കിലും രക്ഷയുണ്ടായില്ല. ഒടുവില് മത്സരം ഗോളില്ലാ സമനിലയില് പര്യവസാനിക്കുകയായിരുന്നു.
27-ാം മിനിറ്റില് ഇറാന് അനുകൂലമായി ലഭിച്ച ഫ്രീകിക്കിനൊടുവില് ടീമിലെ സെന്ട്രല് സ്ട്രൈക്കര് മെഹ്ദി ടറേമി കുര്ത്വയെ കീഴടക്കി ബെല്ജിയം വലയില് ഗോള് നിക്ഷേപിച്ചെങ്കിലും വാര് പരിശോധനയെ തുടര്ന്ന് പിന്വലിക്കപ്പെട്ടു. ആദ്യ പകുതി തീരും മുമ്പേ ബെല്ജിയം ഗോള് കണ്ടെത്താനുള്ള പല വിധ ശ്രമങ്ങള് പയറ്റിയെങ്കിലും ഇറാന് ഗോളി അലിറേസ ബെയ്റന്വന്ദ് തീര്ത്ത തടസ്സങ്ങളെ മറികടക്കാനായില്ല.
രണ്ടാം പകുതിയില് ബെല്ജിയം കൂടുതല് തന്ത്രപരമായ നീക്കങ്ങളിലൂടെ ഗോള് നേടാനുള്ള ശ്രമം ശക്തിപ്പെടുത്തിയെങ്കിലും ബെല്ജിയം കാവല്ക്കാരന് ബെയ്റന്വന്ദിന് മുന്നില് ഒന്നും ചെയ്യാനായില്ല. 67-ാം മിനിറ്റില് മികച്ചൊരു കൗണ്ടര് അറ്റാക്കിന് അവസരം കിട്ടിയ ഇറാന് താരത്തെ അപകടകരമായ രീതിയില് ഫൗള് ചെയ്തിന് ബെല്ജിയം പ്രതിരോധ താരം നഥാന് എന്ഗോയിയെ റഫറി ചുവപ്പ് കാര്ഡ് കാട്ടി പുറത്താക്കി. പത്ത് പേരായി ചുരുങ്ങിയിട്ടും ബെല്ജിയം ടീം മുന്നേറ്റത്തില് കാര്യമായ കുറവ് പ്രകടമാക്കിയില്ല. എങ്കിലും എതിര് ഗോള് കീപ്പറുടെ വീര്യത്തിന് മുന്നില് കീഴടങ്ങി മത്സരം ജയിക്കാതെ തീര്ക്കാനായിരുന്നു വിധി. കോച്ച് റൂഡി ഗാര്ഷ്യ ബെല്ജിയം താരങ്ങളായ റൊമേലു ലുക്കാക്കുവിനെയും(73) കെവിന് ഡിബ്രൂയിനെയും(87) വരെ മാറ്റി പരീക്ഷിച്ചു നോക്കിയിട്ടും ഒന്നും നടന്നില്ല.
തുടര്ച്ചയായ രണ്ടാം മത്സരവും സമനിലയിലായതോടെ ഗ്രൂപ്പ് ജിയിലെ രണ്ട് വീതം മത്സരങ്ങള് കഴിയുമ്പോള് വമ്പോടെയെത്തിയ ബെല്ജിയത്തിന് നേടാനായത് രണ്ട് പോയിന്റ് മാത്രം. അവസാന ഗ്രൂപ്പ് പോരാട്ടത്തില് ന്യൂസിലന്ഡ് ആണ് ഇവരുടെ എതിരാളികള്. വെള്ളിയാഴ്ച്ച (ഭാരത സമയം ശനിയാഴ്ച്ച രാവിലെ 8.30)യാണ് ഈ നിര്ണായക പോരാട്ടം.
