കൊച്ചി: വിമര്ശനങ്ങളെ പ്രതിരോധിക്കാന് ശ്വേത മേനോന് ‘വുമണ് കാര്ഡ്’ ഇറക്കിയെന്ന് നടന് ബാബുരാജ്. സംഘടനയുടെ വാര്ഷിക കണക്കുകളില് ഗുരുതരമായ പിഴവുകളുണ്ടായിരുന്നുവെന്നും കുടുംബസംഗമത്തിനായി ചെലവഴിച്ച 67 ലക്ഷം രൂപയുടെ കണക്ക് റിപ്പോര്ട്ടില് ഉള്പ്പെടുത്തിയിരുന്നില്ലെന്നും ബാബുരാജ് ആരോപിച്ചു.
ജനറല് ബോഡി യോഗത്തില് അവതരിപ്പിച്ച വാര്ഷിക റിപ്പോര്ട്ടിന്റെയും കണക്കുകളുടെയും ഉത്തരവാദിത്വം ട്രഷറര് ഏറ്റെടുക്കാന് തയ്യാറായില്ല. ഇത്രയും നാള് ഭരണസമിതി ‘വുമണ് കാര്ഡ്’ ഉപയോഗിച്ച് വിമര്ശനങ്ങളെ പ്രതിരോധിക്കുകയായിരുന്നു. എന്നാല് ജനറല് ബോഡിയില് അത് പൊളിഞ്ഞുവീണു.
അന്സിബയുടെ പരാതിയില് നടപടി സ്വീകരിക്കാതെ അമ്മയ്ക്ക് ഇതുമായി ബന്ധമില്ല എന്ന നിലപാട് സ്വീകരിച്ച പ്രസിഡന്റിന്റെ നേതൃത്വത്തില് സ്ത്രീകള്ക്ക് എങ്ങനെ നീതി ലഭിക്കുമെന്ന് ബാബുരാജ് ചോദിച്ചു. ടിനി ടോമിന്റെയും അന്സിബയുടെയും പരാതികള് വഷളാക്കിയത് ശ്വേത മേനോനും സംഘവുമാണ്.
കുറ്റാരോപിതരായ ചില ആളുകളുടെ കൈയ്യിലേക്ക് സംഘടനയെ വീണ്ടും എത്തിക്കാനുള്ള നീക്കമാണ് ജനറല് ബോഡിയില് നടന്നതെന്ന ശ്വേതാമേനോന്റെ പ്രസ്താവനയ്ക്കു പിന്നാലെയാണ് ബാബുരാജിന്റെ പ്രതികരണം. ലൈംഗിക ആരോപണവിധേയരായ ബാബുരാജ്, സിദ്ദിഖ്, ഇടവേള ബാബു എന്നിവരാണ് ശ്വേതക്കെതിരായ പട നയിച്ചു വിജയം നേടിയത്.
